CM વિજય રૂપાણીએ અંબાજીમાં માં અંબેના કર્યા દર્શન

અંબાજી પહોંચી માતાજીના પૂજન-અર્ચન શ્રીમતી અંજલીબેન રૂપાણી સાથે કર્યા.

મુખ્યમંત્રી વિજયભાઇ રૂપાણીએ સતત બીજીવાર રાજય શાસનનું દાયિત્વ સંભાળ્યા બાદ બુધવારે સવારે આદ્યશક્તિ અંબાજી માતાજીના દર્શન-પૂજન અંબાજી યાત્રાધામમાં કર્યા હતા. વિજયભાઇ મંગળવારે અંબાજી પહોંચ્યા હતા અને વહેલી સવારે માતાજીની પૂજા-અર્ચના શ્રીમતી અંજલીબેન રૂપાણી સાથે કર્યા હતા. તેમણે રાજયના સૌ નાગરિકોની સુખાકારી શાંતિ, સલામતિ અને રાજયના ઉત્તરોત્તર વિકાસમાં દૈવીશક્તિના કૃપા આશિષ સદાય વરસતા રહે તેવી પ્રાર્થના માતાજીના ચરણોમાં કરી હતી. મુખ્યમંત્રીના આગમન પ્રસંગે કલેકટર કમ અંબાજી દેવસ્થાન ટ્રસ્ટના ચેરમેન દિલીપ રાણાએ મુખ્યમંત્રીનું પુષ્‍પગુચ્છથી સ્વાગત કર્યું હતું. આ પ્રસંગે રેન્જ આઇ.જી. પિયુષ પટેલ, પોલીસ અધિક્ષક નિરજ બડગુજર, અંબાજી દેવસ્થાન ટ્રસ્ટના વહીવટદાર એસ.જે.ચાવડા, દાંતા પ્રાંત અધિકારી બી.ડી.વાઘેલા સહિત અધિકારીઓ, અગ્રણીઓ વગેરે ઉપસ્થિત રહ્યા હતા.