NEET ષડયંત્ર મુદ્દે હવે પંચમહાલ પોલીસ પાસેથી તપાસ CBIને સોંપાઈ

સમગ્ર દેશમાં ચકચાર મચાવનાર નીટની પરીક્ષામાં ચોરી કરાવવાના ષડયંત્ર મામલે ગોધરા શહેર ફરી એક વાર કુખ્યાત થયું છે.  ગોધરા સ્થિત જય જલારામ સ્કુલમાં ગત 5 મે ના રોજ યોજાયેલા નીટની પરીક્ષામા ચોરી કરાવવાનું મોટુ ષડયંત્ર જિલ્લા કલેક્ટરને મળેલ માહિતીના આધારે પરીક્ષા દરમિયાન જ રેડ કરતા ચોરી સફળ નહોતી થઇ શકી.

આ મામલે એફ આઈ આર થયા બાદ પાંચ આરોપીઓને પકડી કોર્ટમાંથી રિમાન્ડ લઇ હાલ રિમાન્ડ બાદ જ્યુડીશયલ કસ્ટડીમાં છે, ત્યારે આ મામલે પંચમહાલ પોલીસ તપાસ કરી રહી છે અને સમગ્ર દેશમાં નીટની પરીક્ષાને લઇને મામલો ખુબજ ગરમાતા હવે આ તપાસ સીબીઆઈને સોંપવાનો સરકાર દ્વારા ઓડર કરવામા આવતા ગોધરા નીટ ચોરી પ્રકરણમા હવે આગળની તપાસ સીબીઆઈ કરશે. એના ભાગ સ્વરૂપ આજે સીબીઆઇની 4 સભ્યોની ટીમ ગોધરા આવી પહોંચી હતી

ગોધરા સર્કિટ હાઉસ ખાતે સીબીઆઇની આ ટીમને પંચમહાલ પોલીસ અને નીટ ચોરીના તપાસ અધિકારી એન. વિ. પટેલ એ મુલાકાત કરી તપાસના દસ્તાવેજ સુપ્રત કરવાની કાર્યવાહી આરંભી છે. જોકે એક હજારથી વધુ પાના ના આ દસ્તાવેજોને હેન્ડઓવર કરવામાં એકથી બે દિવસ જેટલો સમય જાય એમ છે ત્યાર બાદ સીબીઆઈની ટીમ સમગ્ર મામલે નવેસરથી તપાસ શરુ કરી શકે એમ છે.