અમેરિકાને ઈરાનનો પડકાર: ‘ઊર્જા મથકો પર હુમલો થયો તો તેલ 200 ડૉલરને પાર’ જશે

મધ્ય પૂર્વમાં યુદ્ધની જ્વાળાઓ વધુ વિકરાળ બની રહી છે. ઈરાનના ખાતમ અલ-અનબિયા સેન્ટ્રલ હેડક્વાર્ટરે ક્ષેત્રના મુસ્લિમ દેશોને આહવાન કર્યું છે કે તેઓ અમેરિકા અને ઈઝરાયેલને ઈરાનના ઈંધણ અને ઉર્જા મથકો પર હુમલા કરતા અટકાવે. ઈરાને અત્યંત આક્રમક વલણ અપનાવતા ચેતવણી આપી છે કે જો તેના ઈન્ફ્રાસ્ટ્રક્ચર પર હુમલા ચાલુ રહેશે, તો તે પણ તેટલી જ ભયાનક જવાબી કાર્યવાહી કરશે.

ઈંધણ ભંડારો પર મિસાઈલ હુમલાથી અફરાતફરી
ખાતમ અલ-અનબિયાના પ્રવક્તા ઈબ્રાહિમ ઝોલ્ફાગરીએ શનિવારે રાત્રે થયેલા હુમલા બાદ આ નિવેદન આપ્યું હતું. અમેરિકા અને ઈઝરાયલે તેહરાન અને પડોશી અલ્બોર્ઝ પ્રાંતમાં અનેક ઈંધણ સંગ્રહ કેન્દ્રોને નિશાન બનાવ્યા હતા. નેશનલ ઈરાનિયન ઓઈલ રિફાઈનિંગ એન્ડ ડિસ્ટ્રિબ્યુશન કંપનીના જણાવ્યા અનુસાર, મિસાઈલ પડવાને કારણે તેલના ભંડારોમાં ભીષણ આગ લાગી હતી, જેના કારણે દેશમાં ઈંધણ પુરવઠો ખોરવાયો છે અને પર્યાવરણ તેમજ સ્વાસ્થ્ય સામે ગંભીર જોખમો ઉભા થયા છે.

વૈશ્વિક અર્થતંત્રને ઈરાનની ચેતવણી
ઝોલ્ફાગરીએ અમેરિકા અને ઈઝરાયલ પર "નિર્દયતાપૂર્વક" જાહેર સેવા કેન્દ્રો અને ઉર્જા માળખા પર હુમલા કરવાનો આરોપ લગાવતા કહ્યું કે આ હુમલાઓમાં અનેક સામાન્ય નાગરિકોએ જીવ ગુમાવ્યા છે. તેમણે વિશ્વને ચેતવણી આપતા જણાવ્યું કે, "જો આ હુમલાઓ નહીં અટકે તો ક્ષેત્રમાં ભયાનક જવાબી કાર્યવાહી કરવામાં આવશે. જો તમે પ્રતિ બેરલ 200 ડોલરથી વધુ તેલની કિંમત સહન કરવાની તાકાત ધરાવતા હોવ, તો જ આ ખતરનાક રમત ચાલુ રાખજો."

સર્વોચ્ચ નેતાનું મોત અને પલટવાર
આ વર્તમાન તણાવ 28 ફેબ્રુઆરીના હુમલા બાદ ચરમસીમાએ પહોંચ્યો છે, જેમાં અમેરિકા અને ઈઝરાયલે ઈરાનના સર્વોચ્ચ નેતા અલી ખામેનેઈ, તેમના પરિવારના સભ્યો અને વરિષ્ઠ સૈન્ય કમાન્ડરોને નિશાન બનાવી મોતને ઘાટ ઉતાર્યા હતા. આ ઘટનાના જવાબમાં ઈરાને શનિવારે ઈઝરાયેલના હાઈફા શહેરમાં આવેલી તેલ રિફાઈનરી પર 'ખૈબરશેકન' મિસાઈલો વડે હુમલો કરી પોતાની તાકાતનું પ્રદર્શન કર્યું હતું.

તેહરાનમાં ધડાકાઓના પડઘા
શનિવારે રાત્રે તેહરાનમાં થયેલા હુમલાઓની તીવ્રતા એટલી વધુ હતી કે રાજધાનીના અનેક વિસ્તારોમાં પ્રચંડ ધડાકાઓ સંભળાયા હતા. ઈરાની વાયુસેના અને ફાયર બ્રિગેડની ટીમો આગ પર કાબૂ મેળવવા અને વધારાના હુમલાઓને રોકવા માટે હાઈ-એલર્ટ પર છે.

ઈરાનનો પક્ષ: મુસ્લિમ દેશો દખલગીરી કરી અમેરિકા-ઈઝરાયલને અટકાવે.
આર્થિક સંકટ: તેલના ભાવમાં તોતિંગ વધારાની વૈશ્વિક બજારને ધમકી.
જવાબી હુમલો: ઈઝરાયલની હાઈફા રિફાઈનરી પર ઈરાનનો મિસાઈલ મારો.
માનવીય સંકટ: ઉર્જા મથકો પરના હુમલાથી નાગરિકોના મોત અને સેવાઓ ઠપ્પ.