ઈરાનની સ્કૂલ પર હુમલાનો નવો વીડિયો:અમેરિકી 'ટોમહોક' મિસાઈલ હોવાનો દાવો

ઈરાનના મિનાબ શહેરમાં આવેલી એક પ્રાથમિક શાળા પર થયેલા ભીષણ હુમલા અંગે એક નવો અને ચોંકાવનારો વીડિયો સામે આવ્યો છે. આ વીડિયોમાં દાવો કરવામાં આવ્યો છે કે ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC) ના નેવલ બેઝ પર અમેરિકા દ્વારા કરવામાં આવેલા હવાઈ હુમલા દરમિયાન જ આ દુર્ઘટના ઘટી હતી. ઉલ્લેખનીય છે કે, 28 ફેબ્રુઆરીએ થયેલા આ હુમલામાં 160 થી વધુ વિદ્યાર્થીઓના મોત થયા હતા.

વીડિયોમાં 'ટોમહોક' મિસાઈલ દેખાઈ
ઈરાની ન્યૂઝ એજન્સી 'મેહર ન્યૂઝ' દ્વારા જાહેર કરવામાં આવેલો આ વીડિયો નજીકના એક કન્સ્ટ્રક્શન સાઈટ પરથી લેવામાં આવ્યો છે. મીડિયા રિપોર્ટ્સ અને હથિયાર નિષ્ણાતોના મતે, વીડિયોમાં દેખાતી મિસાઈલ અમેરિકાની ઘાતક 'ટોમહોક લેન્ડ એટેક મિસાઈલ' (TLAM) જેવી લાગે છે. નિષ્ણાત સેમ લેયરના જણાવ્યા અનુસાર, મિસાઈલનો આકાર, તેની પાંખો અને પાછળની ટેલ કિટ સ્પષ્ટપણે અમેરિકી બનાવટની હોવાના પુરાવા આપે છે. મહત્વની વાત એ છે કે ઇઝરાયેલ આ પ્રકારની ટોમહોક મિસાઈલનો ઉપયોગ કરતું નથી.

ટ્રમ્પના દાવાઓ સામે વિરોધાભાસ
અમેરિકી રાષ્ટ્રપતિ ડોનાલ્ડ ટ્રમ્પે શનિવારે દાવો કર્યો હતો કે મિનાબની સ્કૂલ પર થયેલા હુમલા માટે ઈરાન પોતે જ જવાબદાર છે. જોકે, આંતરરાષ્ટ્રીય મીડિયા સંસ્થાઓના વિશ્લેષણ ટ્રમ્પના આ દાવાને ખોટા સાબિત કરી રહ્યા છે. વીડિયોમાં દેખાય છે કે મિસાઈલ IRGC બેઝની બરોબર વચ્ચે આવેલી ઇમારત પર પડી હતી, જેની એકદમ નજીક જ આ પ્રાથમિક શાળા આવેલી હતી.

1332 નાગરિકોના મોતનો દાવો
યુએનમાં ઈરાનના રાજદૂત અમીર સઈદ ઈરાવાનીએ શુક્રવારે જણાવ્યું હતું કે 28 ફેબ્રુઆરીથી શરૂ થયેલા અમેરિકા અને ઈઝરાયેલના સંયુક્ત હુમલાઓમાં અત્યાર સુધીમાં ઓછામાં ઓછા 1332 ઈરાની નાગરિકો માર્યા ગયા છે, જેમાં મોટી સંખ્યામાં મહિલાઓ અને બાળકોનો સમાવેશ થાય છે. આ હુમલાઓમાં હજારો લોકો ઘાયલ થયા હોવાનું પણ તેમણે ઉમેર્યું હતું.

નિષ્ણાતોનું તારણ
હથિયાર નિષ્ણાતોનું માનવું છે કે વીડિયોમાં ભલે સ્કૂલ પર સીધો હુમલો થતો નથી દેખાતો, પરંતુ જે રીતે મિસાઈલ IRGC ના ઠેકાણા પર પડી અને જે રીતે વિનાશ થયો, તે જોતા પૂરેપૂરી સંભાવના છે કે શાળા પણ આ જ અમેરિકી કાર્યવાહીનો ભોગ બની હોય.