ઓલિમ્પિક સ્નોબોર્ડરથી 'ડ્રગ કિંગપિન' સુધીની સફર: FBIએ રાયન વેડિંગની ધરપકડનો વીડિયો જાહેર કર્યો

ફેડરલ બ્યુરો ઓફ ઇન્વેસ્ટિગેશન (FBI) એ શુક્રવારે એક હચમચાવી દેનારો વીડિયો જાહેર કર્યો છે. જેમાં કેનેડાના ભૂતપૂર્વ ઓલિમ્પિક સ્નોબોર્ડર અને હવે કુખ્યાત ડ્રગ માફિયા બની ગયેલા રાયન વેડિંગ (Ryan Wedding) ને હાથકડી સાથે કેલિફોર્નિયાના એરપોર્ટ પર લાવવામાં આવ્યો છે. વર્ષોથી ફરાર આ આરોપીને મેક્સિકો સિટીમાંથી ઝડપી પાડવામાં આવ્યો છે.

ઓલિમ્પિક મેદાનથી ગુનાની દુનિયા સુધી
રાયન વેડિંગે વર્ષ 2002 ના સોલ્ટ લેક સિટી વિન્ટર ઓલિમ્પિકમાં કેનેડાનું પ્રતિનિધિત્વ કર્યું હતું. જોકે, રમતગમતની દુનિયા છોડ્યા બાદ તે ગુનાખોરીના માર્ગે ચઢી ગયો હતો. FBI ના ડાયરેક્ટર કાશ પટેલે એક પ્રેસ કોન્ફરન્સમાં જણાવ્યું હતું કે, વેડિંગ આધુનિક સમયનો સૌથી મોટો ડ્રગ ટ્રાફિકર છે. તેની સરખામણી કુખ્યાત ડ્રગ લોર્ડ્સ પાબ્લો એસ્કોબાર અને 'અલ ચાપો' ગુઝમેન સાથે કરવામાં આવી છે.

અબજો ડોલરનું નેટવર્ક અને હત્યાના આરોપો
તપાસ અધિકારીઓના જણાવ્યા અનુસાર, વેડિંગ એક એવું વિશાળ નેટવર્ક ચલાવતો હતો જે કોલંબિયાથી મેક્સિકો થઈને અમેરિકા અને કેનેડા સુધી સેંકડો કિલોગ્રામ કોકેઈન પહોંચાડતું હતું. તે મેક્સિકોના ખતરનાક સિનાલોઆ કાર્ટેલ (Sinaloa Cartel) સાથે સીધો જોડાયેલો હોવાનું મનાય છે. તેનું ડ્રગ સામ્રાજ્ય વાર્ષિક $1 બિલિયન (અંદાજે ₹8,300 કરોડ) થી વધુની કમાણી કરતું હતું. ડ્રગના વેપારમાં અવરોધ બનતા લોકોની હત્યા કરાવવાના પણ તેના પર ગંભીર આરોપો છે. "રાયન વેડિંગે ઓલિમ્પિક સ્નોબોર્ડરથી શરૂઆત કરી હતી, પરંતુ તે આધુનિક યુગનો સૌથી મોટો નાર્કો-ટ્રાફિકર બની ગયો." - કાશ પટેલ, ડાયરેક્ટર, FBI

ધરપકડ અને આગામી કાર્યવાહી
લાંબા સમય સુધી ફરાર રહ્યા બાદ ગુરુવારે રાત્રે મેક્સિકો સિટીમાં તેની ધરપકડ કરવામાં આવી હતી. શુક્રવારે તેને ખાસ વિમાન દ્વારા કેલિફોર્નિયાના ઓન્ટારિયો ઇન્ટરનેશનલ એરપોર્ટ પર લાવવામાં આવ્યો હતો. વીડિયોમાં જોઈ શકાય છે કે FBI ના એજન્ટો તેને કડક સુરક્ષા વચ્ચે હાથકડી પહેરાવીને લઈ જઈ રહ્યા છે. હવે તેની સામે અમેરિકાની કોર્ટમાં ગંભીર ગુનાહિત ટ્રાયલ ચલાવવામાં આવશે.