કોંગોમાં ઈબોલાના 900થી વધુ શંકાસ્પદ કેસ નોંધાયા, WHOની રાષ્ટ્રીય જોખમની ચેતવણી

ડેમોક્રેટિક રિપબ્લિક ઓફ ધ કોંગો (DRC) માં ઈબોલા વાયરસનો પ્રકોપ ઝડપથી વધી રહ્યો છે. વિશ્વ આરોગ્ય સંસ્થા (WHO) ના ડાયરેક્ટર-જનરલ ટેડ્રોસ અધાનમ ઘેબ્રેયસસે જણાવ્યું છે કે દેશમાં સર્વેલન્સ (દેખરેખ) વધારવામાં આવતા અત્યાર સુધીમાં ઈબોલાના ૯૦૦થી વધુ શંકાસ્પદ કેસો ઓળખી કાઢવામાં આવ્યા છે, જેમાંથી ૧૦૧ કેસ કન્ફર્મ (પોઝિટિવ) થઈ ચૂક્યા છે.

ડેમોક્રેટિક રિપબ્લિક ઓફ ધ કોંગો (DRC) માં ઈબોલા વાયરસનો પ્રકોપ ઝડપથી વધી રહ્યો છે. વિશ્વ આરોગ્ય સંસ્થા (WHO) ના ડાયરેક્ટર-જનરલ ટેડ્રોસ અધાનમ ઘેબ્રેયસસે જણાવ્યું છે કે દેશમાં સર્વેલન્સ (દેખરેખ) વધારવામાં આવતા અત્યાર સુધીમાં ઈબોલાના ૯૦૦થી વધુ શંકાસ્પદ કેસો ઓળખી કાઢવામાં આવ્યા છે, જેમાંથી ૧૦૧ કેસ કન્ફર્મ (પોઝિટિવ) થઈ ચૂક્યા છે.

હિંસા અને વિસ્થાપન વચ્ચે ઈબોલા સામે જંગ
આ ફાટી નીકળેલા વાયરસનું મુખ્ય કેન્દ્ર કોંગોનો 'ઇતુરી' (Ituri) પ્રાંત છે, જ્યાં લગભગ ૫૦ લાખ લોકો સતત ચાલી રહેલા સશસ્ત્ર સંઘર્ષ અને હિંસા વચ્ચે જીવી રહ્યા છે. આ વિસ્તારમાં દર ચારમાંથી એક વ્યક્તિને માનવતાવાદી સહાયની જરૂર છે, જ્યારે દર પાંચમાંથી એક વ્યક્તિ આંતરિક રીતે વિસ્થાપિત (પોતાનું ઘર છોડવા મજબૂર) થઈ ચૂકી છે. ડબ્લ્યુએચઓ ચીફે સોશિયલ મીડિયા પ્લેટફોર્મ X પર શેર કર્યું કે, "ભયાનક હિંસાના કારણે સામાન્ય લોકોની સાથે-સાથે હેલ્થ અને હ્યુમેનિટેરિયન વર્કર્સ (આરોગ્ય કર્મચારીઓ) ને પણ ભાગી જવાની ફરજ પડી રહી છે. આ અસુરક્ષાને કારણે ઈબોલાના દર્દીઓના કોન્ટેક્ટ ટ્રેસિંગ અને ચેપની વહેલી ઓળખ કરવામાં મોટી અડચણો આવી રહી છે."

ગ્લોબલ એલર્ટ: જોખમનું સ્તર 'ખૂબ ઊંચું' 
તાજેતરમાં જ ૧૬ મેના રોજ, WHO ના ચીફે જાહેરાત કરી હતી કે કોંગો અને યુગાન્ડામાં 'બુંદીબુગ્યો વાયરસ' (Bundibugyo virus) દ્વારા ફેલાયેલો ઈબોલા રોગ એ "આંતરરાષ્ટ્રીય ચિંતાની જાહેર આરોગ્ય કટોકટી" (PHEIC) છે. પરિસ્થિતિની ગંભીરતાને જોતા, ૨૨ મેના રોજ WHO એ રાષ્ટ્રીય સ્તરે આ રોગના જોખમના મૂલ્યાંકનને સુધારીને "ખૂબ જ ઊંચું" (Very High) કર્યું છે, જ્યારે પ્રાદેશિક સ્તરે તે "ઊંચું" અને વૈશ્વિક સ્તરે "નીચું" છે.

કેટલો ખતરનાક છે ઈબોલા?
મૃત્યુદર: ઈબોલા એ અત્યંત ગંભીર અને જીવલેણ રોગ છે. આ રોગમાં સરેરાશ મૃત્યુદર ૫૦% જેટલો હોય છે. ભૂતકાળમાં ફાટી નીકળેલા રોગચાળા દરમિયાન આ મૃત્યુદર ૨૫% થી લઈને ૯૦% સુધી નોંધાયો છે.

કેવી રીતે ફેલાય છે?

આ વાયરસ સૌપ્રથમ જંગલી પ્રાણીઓ (જેમ કે ચામાચીડિયા, સાહુડી અને વાંદરાઓ) માંથી માણસોમાં ટ્રાન્સફર થાય છે. ત્યારબાદ, સંક્રમિત વ્યક્તિના લોહી, અંગો, લાળ અથવા અન્ય શારીરિક પ્રવાહીના સીધા સંપર્કમાં આવવાથી તે અન્ય લોકોમાં ઝડપથી ફેલાય છે. દર્દીના કપડાં કે પથારીના સંપર્કમાં આવવાથી પણ આ ચેપ લાગી શકે છે. ઇતુરી પ્રાંતના દુર્ગમ અને સૌથી અસુરક્ષિત વિસ્તારોમાં WHO અને તેના પાર્ટનર્સ હાજર રહીને આરોગ્ય સેવાઓ પૂરી પાડી રહ્યા છે, જેથી સ્થાનિક સમુદાયોમાં વિશ્વાસ ઉભો કરી શકાય અને આ જીવલેણ વાયરસને આગળ વધતો અટકાવી શકાય.