'ગંગા-મહાકમ વિઝન' સાથે ભારત-ઇન્ડોનેશિયા સંબંધોની નવી શરૂઆત: PM મોદી

પ્રધાનમંત્રી નરેન્દ્ર મોદીએ મંગળવારે ઇન્ડોનેશિયાની સંસદને સંબોધિત કરતા ભારત અને ઇન્ડોનેશિયાના દ્વિપક્ષીય સંબંધોને નવી દિશા આપવા માટે 'ગંગા-મહાકમ વિઝન'નું આહવાન કર્યું હતું. તેમણે કહ્યું હતું કે બંને દેશોએ સભ્યતાના સંબંધો, વિકાસ, સુરક્ષા, દરિયાઈ સમૃદ્ધિ અને ગ્લોબલ સાઉથના સહિયારા અવાજને મજબૂત કરવાના આધારે ભવિષ્યની ભાગીદારીને આગળ વધારવી જોઈએ.

વિદેશ મંત્રાલય (MEA) મુજબ, પ્રધાનમંત્રીના સંબોધનમાં ભારત અને ઇન્ડોનેશિયા વચ્ચે સદીઓ જૂના સભ્યતાના સંબંધો, સહિયારા લોકતાંત્રિક મૂલ્યો અને વ્યાપક વ્યૂહાત્મક ભાગીદારી (કોમ્પ્રિહેન્સિવ સ્ટ્રેટેજિક પાર્ટનરશિપ)ને વધુ મજબૂત કરવાની પ્રતિબદ્ધતા દોહરાવવામાં આવી હતી. 

પીએમ મોદીએ ભારતના 'વિકસિત ભારત 2047' અને ઇન્ડોનેશિયાના 'ગોલ્ડન ઇન્ડોનેશિયા 2045 (ઇન્ડોનેશિયા એમાસ 2045)'ના વિઝનનો ઉલ્લેખ કરતા વેપાર, રોકાણ, સંપર્ક, ખાદ્ય અને ઊર્જા સુરક્ષા, ડિજિટલ જાહેર ઈન્ફ્રાસ્ટ્રક્ચર અને ઉભરતી ટેકનોલોજીના ક્ષેત્રમાં સહયોગ વધારવાનું આહવાન કર્યું હતું. 

ગંગા-મહાકમ વિઝન અંગે પીએમએ કહ્યું, "હું આપ સૌની સામે 'ગંગા-મહાકમ વિઝન' રાખવા માંગુ છું. આ વિઝન આપણી ભાગીદારીને માત્ર વર્તમાન જરૂરિયાતો સુધી મર્યાદિત નથી રાખતું, પરંતુ આવનારી પેઢીઓની સુરક્ષા અને સહિયારી પ્રગતિનો માર્ગ પણ મોકળો કરે છે. અમે અમારા સભ્યતાના સંબંધોને નવી પેઢીના વિચાર સાથે જોડીશું. રામાયણથી લઈને બોરોબુદુર સુધી, અમે અમારા સહિયારા ઇતિહાસને ભવિષ્યની તાકાત બનાવીશું. આ માટે આપણે 'ભારત-ઇન્ડોનેશિયા સભ્યતા સંવાદ' શરૂ કરવો જોઈએ." 

તેમણે કહ્યું કે ભારત, ઇન્ડોનેશિયા સાથે મળીને ગ્લોબલ સાઉથના અવાજને વધુ મજબૂત કરવા અને સ્વતંત્ર, મુક્ત, સર્વસમાવેશી અને નિયમ-આધારિત ઇન્ડો-પેસિફિક ક્ષેત્રના નિર્માણ માટે પ્રતિબદ્ધ છે. 

સંબોધન દરમિયાન, પ્રધાનમંત્રી મોદીએ ઇન્ડોનેશિયાના સર્વોચ્ચ નાગરિક સન્માન 'બિંતાંગ આદિપૂર્ણા ઓફ ધ રિપબ્લિક ઓફ ઇન્ડોનેશિયા'થી સન્માનિત કરવા બદલ રાષ્ટ્રપતિ પ્રબોવો સુબિયાંતો અને ઇન્ડોનેશિયાની જનતાનો આભાર પણ વ્યક્ત કર્યો હતો. તેમણે કહ્યું હતું કે આ સન્માન બંને દેશોના સહિયારા લોકતાંત્રિક મૂલ્યો, સાંસ્કૃતિક વારસા અને ગાઢ સંબંધોનું પ્રતીક છે. 

પ્રધાનમંત્રીએ કહ્યું, "રાષ્ટ્રપતિ પ્રબોવો સુબિયાંતોએ કોપીરાઈટની વાત કરી. સન્માન પર કોઈનો કોપીરાઈટ હોઈ શકે નહીં. સુબિયાંતો સાથેની મારી મિત્રતા પણ કોઈ કોપીરાઈટની સીમાઓમાં બંધાયેલી નથી." તેમણે આગળ કહ્યું, "ભલે ભારત અને ઇન્ડોનેશિયાની રાજધાનીઓ વચ્ચે હજારો કિલોમીટરનું અંતર હોય, પરંતુ સમુદ્રના માર્ગે આ અંતર માત્ર 150 કિલોમીટર છે. વિશ્વના અનેક દેશોમાં સમુદ્ર સીમાઓ અને અંતરનું પ્રતીક રહ્યો છે, પરંતુ ભારત અને ઇન્ડોનેશિયા વચ્ચે સમુદ્ર ક્યારેય અંતરનું નહીં, પરંતુ સેતુનું પ્રતીક રહ્યો છે. આ જ સમુદ્ર આપણા સહિયારા ભવિષ્યનું કેન્દ્ર છે." 

પ્રધાનમંત્રી મોદીએ સોશિયલ મીડિયા હેન્ડલ 'X' પર પણ પોતાના સંબોધનની જાણકારી શેર કરતા લખ્યું, "ઇન્ડોનેશિયાની સંસદને સંબોધિત કરવી મારા માટે સન્માનની વાત છે. ભારત અને ઇન્ડોનેશિયા સદીઓ જૂના ઇતિહાસ, સંસ્કૃતિ અને લોકો વચ્ચેના મજબૂત સંબંધોથી જોડાયેલા છે. અમે મિત્રતા, સહયોગ અને સહિયારી સમૃદ્ધિ પર આધારિત ભવિષ્ય માટે મળીને કામ કરતા રહીશું."