જાપાનમાં 7.4ની તીવ્રતાનો શક્તિશાળી ભૂકંપ, સુનામીની ચેતવણી જાહેર

જાપાનના ઈશાન ભાગમાં આવેલા સાનરિકુ કિનારા પર સોમવારે(20 એપ્રિલ, 2026) બપોરે 7.4ની તીવ્રતાનો વિનાશક ભૂકંપ ત્રાટક્યો હતો, ત્યારબાદ પેસિફિક મહાસાગરમાં ઈવાતે અને આઓમોરી પ્રીફેક્ચરના કિનારે સુનામીના મોજા જોવા મળ્યા છે.

દેશની હવામાન એજન્સી દ્વારા પેસિફિક કોસ્ટ પર આવેલા આઓમોરી, ઈવાતે પ્રીફેક્ચર અને હોક્કાઈડો માટે સુનામીની ચેતવણી જાહેર કરવામાં આવી છે. એજન્સીએ અનુમાન લગાવ્યું છે કે ત્રણ મીટર સુધીના ઊંચા સુનામીના મોજા ગમે ત્યારે કિનારે પહોંચી શકે છે.

મુખ્ય અસરો અને સ્થિતિ:
સુનામીના મોજા: ઈવાતે પ્રીફેક્ચરના કુજી બંદરે 80 સેમી ઊંચા મોજા નોંધાયા હતા. આઓમોરીના હાચિનોહે બંદરે 30 સેમી અને હોક્કાઈડોના એરિમો શહેરમાં 20 સેમી ઊંચા મોજા જોવા મળ્યા હતા. તટીય વિસ્તારોમાં રહેતા હજારો રહેવાસીઓને તાત્કાલિક સુરક્ષિત સ્થળે ખસી જવા આદેશ આપવામાં આવ્યો છે.

ન્યુક્લિયર પ્લાન્ટ સુરક્ષિત: ઓપરેટરો દ્વારા મળેલી માહિતી મુજબ, અસરગ્રસ્ત આઓમોરી અને મિયાગી પ્રીફેક્ચરના ન્યુક્લિયર પ્લાન્ટ્સમાં અત્યાર સુધી કોઈ અસાધારણ ઘટના બની નથી. ફુકુશિમા દાઈચી અને દૈની ન્યુક્લિયર પ્લાન્ટ્સમાં પણ કોઈ નવી સમસ્યા જોવા મળી નથી.

ભૂકંપની વિગત: સ્થાનિક સમય મુજબ સાંજે 4:53 વાગ્યે 10 કિમીની ઊંડાઈએ આ ભૂકંપ આવ્યો હતો. જાપાનના સિસ્મિક સ્કેલ પર તેની તીવ્રતા 7.4 નોંધાઈ હતી.

પરિવહન સેવા ખોરવાઈ: ભૂકંપના કારણે ટોક્યો અને શિન-આઓમોરી સ્ટેશનો વચ્ચેની તોહોકુ શિંકનસેન બુલેટ ટ્રેન સેવાઓ સ્થગિત કરી દેવામાં આવી છે.

સરકારની અપીલ: જાપાનના પ્રધાનમંત્રી સાનાએ તાકાઈચીએ પત્રકારો સાથેની વાતચીતમાં અસરગ્રસ્ત વિસ્તારોના લોકોને તાત્કાલિક ઉંચાઈવાળા વિસ્તારોમાં સ્થળાંતર કરવા વિનંતી કરી છે.