ડોનાલ્ડ ટ્રમ્પનું ઈરાનને અલ્ટીમેટમ, 'પરમાણુ કરાર નહીં તો વિનાશ વેરાશે'

અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સાથેના પરમાણુ કરાર અંગે એક મોટું અને મહત્વનું નિવેદન આપ્યું છે. ટ્રમ્પે જણાવ્યું છે કે અમેરિકા ઈરાન સાથે પરમાણુ સમજૂતીની ખૂબ નજીક છે, પરંતુ સાથે જ તેમણે ઈરાનને સ્પષ્ટ શબ્દોમાં ચેતવણી પણ આપી છે કે જો વાટાઘાટો નિષ્ફળ જશે તો લશ્કરી કાર્યવાહીનો વિકલ્પ હજુ પણ મેજ પર છે.

અમેરિકાના રાષ્ટ્રપતિ ડોનાલ્ડ ટ્રમ્પે ઈરાન સાથેના પરમાણુ કરાર અંગે એક મોટું અને મહત્વનું નિવેદન આપ્યું છે. ટ્રમ્પે જણાવ્યું છે કે અમેરિકા ઈરાન સાથે પરમાણુ સમજૂતીની ખૂબ નજીક છે, પરંતુ સાથે જ તેમણે ઈરાનને સ્પષ્ટ શબ્દોમાં ચેતવણી પણ આપી છે કે જો વાટાઘાટો નિષ્ફળ જશે તો લશ્કરી કાર્યવાહીનો વિકલ્પ હજુ પણ મેજ પર છે.

"પરમાણુ હથિયાર નહીં જ બનવા દઈએ": ટ્રમ્પ
વ્હાઇટ હાઉસમાં 'ફોક્સ ન્યૂઝ' ને આપેલી એક ખાસ મુલાકાતમાં ટ્રમ્પે કહ્યું કે, તેમના વહીવટીતંત્રની મુખ્ય પ્રાથમિકતા એ સુનિશ્ચિત કરવાની છે કે ઈરાન ક્યારેય પરમાણુ હથિયાર પ્રાપ્ત ન કરે. ટ્રમ્પે દાવો કર્યો છે કે ઈરાને પરમાણુ હથિયાર ન બનાવવા અથવા તે ખરીદવા પર પ્રતિબંધ મૂકતી ભાષા સાથે સહમતી દર્શાવી છે. ટ્રમ્પે કહ્યું, "મને જે એક ગેરંટી જોઈએ છે તે એ છે કે ઈરાન પાસે કોઈ પરમાણુ હથિયાર ન હોવા જોઈએ. તેઓ આ બાબતે સંમત થયા છે." રાષ્ટ્રપતિએ વધુમાં ઉમેર્યું કે હવે કરારમાં એવી જોગવાઈઓ ઉમેરવામાં આવી છે જે ઈરાનને અન્ય કોઈ સ્ત્રોતમાંથી પણ પરમાણુ હથિયાર ખરીદતા અટકાવશે.

લશ્કરી કાર્યવાહીનો વિકલ્પ ખુલ્લો
વાટાઘાટોને અત્યંત જટિલ ગણાવતા ટ્રમ્પે કહ્યું કે, "ઈરાન અત્યંત કઠોર વાટાઘાટકારો છે, પરંતુ આપણે ધીમે ધીમે આપણને જે જોઈએ છે તે મેળવી રહ્યા છીએ. હું શાંતિપૂર્ણ સમાધાન ઈચ્છું છું, પરંતુ જો આપણે ઈચ્છીએ છીએ તે નહીં મળે, તો અમે પરિસ્થિતિનો અંત અલગ રીતે (લશ્કરી કાર્યવાહી દ્વારા) લાવીશું." તેમણે સ્પષ્ટ કર્યું કે જો કરાર અમેરિકાના હિતોનું રક્ષણ નહીં કરે, તો તે સ્વીકાર્ય રહેશે નહીં.

હોર્મુઝની સામુદ્રધુની મુદ્દે માંગણી
ટ્રમ્પે ઈરાન સાથેના કરાર માટે બે મુખ્ય શરતો રાખી છે:
1. હોરમુઝની સામુદ્રધુની: તેને તાત્કાલિક ખોલવી પડશે અને તે મુક્ત હોવી જોઈએ, કોઈ પણ પ્રકારના ટોલ કે અવરોધ વગર.
2. પરમાણુ હથિયારો: ઈરાન પાસે કોઈ પણ સંજોગોમાં પરમાણુ હથિયાર ન હોવા જોઈએ.

રાજકારણથી પર રહીને નિર્ણય
ટ્રમ્પે એવા આક્ષેપોને ફગાવી દીધા છે કે આવનારા વર્ષની મધ્યવર્તી ચૂંટણીઓને ધ્યાનમાં રાખીને તેઓ ઈરાન પર નરમ કે ગરમ વલણ અપનાવી રહ્યા છે. તેમણે કહ્યું, "મારે દેશ માટે જે સાચું છે તે જ કરવું પડશે." આ નિવેદન એવા સમયે આવ્યું છે જ્યારે મધ્ય પૂર્વમાં મહિનાઓથી ચાલી રહેલા તણાવ બાદ ઈરાન સાથે લાંબા ગાળાના કરાર કરવા માટે ટ્રમ્પ વહીવટીતંત્ર સતત પ્રયાસો કરી રહ્યું છે. ટ્રમ્પનું આ 'પરમાણુ કરાર કે લશ્કરી કાર્યવાહી'નું વલણ ઈરાન માટે હવે મોટી કસોટી સમાન બની ગયું છે.