તુર્કી-સીરિયામાં ભૂકંપમાં મૃતકોની સંખ્યા વધીને 50 હજાર થઈ, 1.6 લાખથી વધુ ઇમારતો ધરાશાયી

તુર્કી અને સીરિયામાં આવેલા ભૂકંપમાં મૃત્યુઆંકની સંખ્યા 50,000થી વધુ થઈ છે. માહિતી અનુસાર તુર્કીમાં 44,200 અને સીરિયામાં 5900થી વધુ લોકોના મોત થયા હતા. 6 ફેબ્રુઆરીએ દક્ષિણપૂર્વીય તુર્કી અને ઉત્તર સીરિયામાં આવેલા પ્રથમ ભૂકંપની તીવ્રતા 7.7 માપવામાં આવી હતી. આ તબાહીથી આ ઉપરાંત 1 લાખ 60 હજારથી વધુ ઇમારતો ધરાશાયી થઈ જયારે 15 લાખ લોકો બેઘર બન્યા છે. તુર્કી અને સીરિયાના ઘણા શહેરો ખંડેરમાં ફેરવાઈ ગયા છે. એક જ ઝાટકે હજારો જીવન નાશ પામ્યા. તુર્કીમાં ભૂકંપનો સિલસિલો ચાલુ છે. બે દિવસ પહેલા 5.0ની તીવ્રતાનો ભૂકંપ આવ્યો હતો. આ વિનાશક ભૂકંપમાં કાટમાળમાં દટાયેલા લોકોને શોધવા અને બચાવની કામગીરી લગભગ પૂરી થઈ ગઈ છે. ભૂકંપથી પ્રભાવિત 11માંથી 9 પ્રાંતોમાં બચાવ કાર્ય પૂર્ણ થઈ ગયું છે. ઉલ્લેખનીય છે કે, તુર્કી સરકારની પ્રારંભિક યોજના અંતર્ગત બેઘર થયેલા લોકો માટે ઓછામાં ઓછા 15 બિલિયન ડોલરના ખર્ચે નવા ઘરો બનાવવામાં આવશે.