પોલેન્ડ અને યુક્રેને દ્વિપક્ષીય સુરક્ષા કરાર પર હસ્તાક્ષર કર્યા

યુક્રેનના રાષ્ટ્રપતિ ઝેલેન્સ્કી અને પોલેન્ડના વડાપ્રધાન ડોનાલ્ડ ટસ્કે વોર્સોમાં દ્વિપક્ષીય સુરક્ષા કરાર પર હસ્તાક્ષર કર્યા છે. વોશિંગ્ટનમાં મંગળવારથી શરૂ થઈ રહેલી નોર્થ એટલાન્ટિક ટ્રીટી ઓર્ગેનાઈઝેશન (નાટો) સમિટના એક દિવસ પહેલા બંને દેશો દ્વારા દ્વિપક્ષીય સુરક્ષા કરાર પર હસ્તાક્ષર કરવામાં આવ્યા હતા.

આ કરારમાં યુક્રેન, ખાસ કરીને હવાઈ સંરક્ષણ માટે પોલેન્ડના સતત સંરક્ષણ સમર્થનની કલ્પના કરવામાં આવી છે. આ સાથે પોલેન્ડે યુક્રેનને ઉર્જા સુરક્ષાને સમર્થન આપવા અને પુનઃનિર્માણમાં ભાગ લેવાની ખાતરી પણ આપી છે.

પોલેન્ડના પીએમ ડોનાલ્ડ ટસ્કે જણાવ્યું હતું કે, યુરોપિયન યુનિયન (EU) અને 19 દેશોએ યુક્રેન સાથે સમાન કરાર પર હસ્તાક્ષર કર્યા છે. તેમણે કહ્યું કે, દસ્તાવેજમાં વ્યવહારિક દ્વિપક્ષીય પ્રતિબદ્ધતાઓ છે અને માત્ર ખાલી વચનો નથી.

તે જ સમયે, યુક્રેનના રાષ્ટ્રપતિ ઝેલેન્સકીએ કહ્યું હતું કે, સંરક્ષણ સહયોગ અને યુક્રેનના સુરક્ષા દળોની જરૂરિયાતો તેમની સરકારની મુખ્ય પ્રાથમિકતા છે. તે શાંતિપૂર્ણ અને મજબૂત યુક્રેન તેમજ શાંતિપૂર્ણ અને મજબૂત પોલેન્ડના નિર્માણમાં માને છે.

આ પહેલા સોમવારે યુક્રેનના રાષ્ટ્રપતિએ પોલેન્ડના રાષ્ટ્રપતિ એન્ડ્રેજ ડુડા સાથે મુલાકાત કરી હતી. વોલોડીમીર ઝેલેન્સકીએ પોલેન્ડના રાષ્ટ્રપતિને રશિયન હુમલાઓ વિશે માહિતી આપી.

ઝેલેન્સકીએ કહ્યું હતું કે, અમે અમારા લોકોને વધુ સુરક્ષા આપવા માટે શું જરૂરી છે તેની ચર્ચા કરી. તેમણે ઉદ્ઘાટન શાંતિ સમિટના મહત્વ તેમજ યુક્રેન અને પોલેન્ડ વચ્ચેના સુરક્ષા કરારની પણ નોંધ લીધી હતી.