પ્રધાનમંત્રી નરેન્દ્ર મોદી સૌથી પ્રભાવશાળી નેતા: અમેરિકન સિંગર

આફ્રિકન-અમેરિકન સિંગર અને લાંબા સમયથી ભારતના પ્રશંસક મેરી મિલબેને વડા પ્રધાન નરેન્દ્ર મોદીને આજની ભૂ-રાજનીતિમાં સૌથી પ્રભાવશાળી અને સૌથી મહત્ત્વપૂર્ણ નેતા ગણાવ્યા છે. તેમણે કહ્યું કે નવી દિલ્હીમાં આ સપ્તાહે થયેલી વડા પ્રધાન મોદી અને રશિયન રાષ્ટ્રપતિ વ્લાદિમીર પુતિનની બેઠકે ભારતની વૈશ્વિક સ્થિતિને વધુ મજબૂત કરી છે.

એક ઇન્ટરવ્યૂમાં મિલબેને કહ્યું કે મોદી-પુતિન વાર્તા બંને દેશો વચ્ચેની ઊંડી ભાગીદારી અને લાંબા સમયથી ચાલી આવતા વિશ્વાસને દર્શાવે છે. તેમના મતે, "વડા પ્રધાન મોદી અને રાષ્ટ્રપતિ પુતિનની આ મુલાકાત ખૂબ જ સફળ રહી. તે નિશ્ચિતપણે ભારત અને રશિયા વચ્ચેના ખૂબ જ ઊંડા જોડાણની તસવીર રજૂ કરે છે, જેમ અમેરિકા અને ભારત વચ્ચે મજબૂત સંબંધો છે."

મિલબેને વડા પ્રધાન મોદીની રાજદ્વારી શૈલીના જોરદાર વખાણ કર્યા. તેમણે કહ્યું કે ઊર્જા, સંરક્ષણ અને આર્થિક સહયોગ જેવા સંવેદનશીલ મામલાઓ પર PM મોદીએ ખૂબ જ સંતુલન અને વ્યૂહાત્મક સમજણ દર્શાવી. વળી, તેમણે એ પણ કહ્યું કે પુતિનની પ્રાથમિકતા તેલ અને સંરક્ષણ સહયોગને આગળ વધારવાની હતી, જ્યારે મોદીએ દરેક મુદ્દા પર ભારતના હિતને કેન્દ્રમાં રાખીને સંવાદ કર્યો. મિલબેને સ્પષ્ટ કહ્યું, "વડા પ્રધાન તે જ કરશે જે ભારતના હિતમાં સૌથી શ્રેષ્ઠ હશે. દરેક નેતા પોતાના દેશ માટે તે જ કરે છે."

ઇન્ટરવ્યૂમાં મિલબેન વારંવાર એ વાત પર ભાર મૂકતા રહ્યા કે વડા પ્રધાન મોદીની વૈશ્વિક પ્રતિષ્ઠા આજે સૌથી ઊંચા સ્તરે છે. તેમણે કહ્યું, "વડા પ્રધાન મોદી આ સમયે દુનિયાના ભૂ-રાજકીય પરિદૃશ્યના સૌથી મહત્ત્વપૂર્ણ અને સૌથી પ્રભાવશાળી નેતા છે. આ એક હકીકત છે, તેને નકારી શકાય નહીં. PM મોદીએ ભારતને અને પોતાને વૈશ્વિક રાજકારણના કેન્દ્રમાં પહોંચાડી દીધા છે." મેરી મિલબેન (જે અમેરિકન રાષ્ટ્રપતિ ડોનાલ્ડ ટ્રમ્પ અને તેમની ટીમ સાથે ઘનિષ્ઠ સંબંધો ધરાવે છે) એ ટ્રમ્પ પ્રશાસનની તાજેતરની ભારત નીતિની આકરી ટીકા કરી. તેમણે કહ્યું, "ભારત સાથેના વેપારને લઈને અમેરિકન વલણ ખૂબ જ આક્રમક હતું. ઘણી વાર આ વલણ દબાણ લાવવા જેવું દેખાયું." 

મિલબેને કહ્યું, "ભારત અમારો મિત્ર છે. સૌથી મજબૂત લોકતાંત્રિક ભાગીદાર છે. મિત્રો સાથે વાતચીતમાં અસહમતિ હોઈ શકે છે, પરંતુ સંબંધોને નુકસાન પહોંચાડ્યા વિના." તેમના મતે, અમેરિકાની બિનજરૂરી આક્રમકતાને કારણે ઘણા મોટા વૈશ્વિક ખેલાડીઓ પોતાના વિકલ્પો શોધવા લાગ્યા, જેની અસર ભારત-રશિયા અને ભારત-ચીનની ડિપ્લોમેસીમાં પણ દેખાઈ. મિલબેને સીધો સૂચન આપ્યો કે ટ્રમ્પે આ મુલાકાતને નવી દૃષ્ટિથી જોવી જોઈએ. તેમણે કહ્યું, "મારી સલાહ છે કે વડા પ્રધાન મોદીને અમેરિકા આમંત્રિત કરો. બેસીને વાતચીત કરો, ડિનર કરો, માફી માગો અને સંબંધોને સુધારો." તેમનું માનવું છે કે આવું પગલું અમેરિકા માટે પણ ફાયદાકારક રહેશે, ખાસ કરીને જો તે રશિયા-યુક્રેન શાંતિ પ્રયાસોમાં આગળ વધવા માંગે છે.

મિલબેને કહ્યું, "દુનિયામાં જો કોઈ નેતા રશિયા-યુક્રેનમાં મધ્યસ્થી બની શકે છે, તો તે માત્ર વડા પ્રધાન મોદી છે." ઇન્ટરવ્યૂમાં મિલબેને કહ્યું કે દુનિયાભરના નેતાઓ આ વર્ષે અમેરિકન ચૂંટણીઓ પર નજીકથી નજર રાખી રહ્યા છે. તેમણે કહ્યું, "દુનિયા જાણે છે કે અમેરિકામાં ચૂંટણીની મોસમ કેવી હોય છે." મિલબેને કહ્યું કે તેમને બંને નેતાઓ પર પૂરો વિશ્વાસ છે અને બંને એકબીજાને સમજે છે. "હું ખરેખર માનું છું કે વડા પ્રધાન મોદી અને રાષ્ટ્રપતિ ટ્રમ્પ મિત્રો છે અને ઘણા સમયથી છે. નવી દિલ્હીમાં મોદીની તાજેતરની રાજદ્વારી કુશળતા તેમના વૈશ્વિક કદને વધુ મજબૂત સાબિત કરે છે. તેમની નેતૃત્વ ક્ષમતા સંપૂર્ણપણે સામે આવી છે. હું તેમની પ્રશંસા કરું છું."

નવી દિલ્હીમાં થયેલ મોદી-પુતિન શિખર સંમેલન ભારત અને રશિયા વચ્ચે ઉચ્ચ સ્તરીય સંવાદનો નવો દોર માનવામાં આવી રહ્યો છે. બંને દેશોની ભાગીદારીનો વિસ્તાર સંરક્ષણ, ઊર્જા, સ્પેસ અને પરમાણુ ક્ષેત્ર સુધી છે. ભારત શરૂઆતથી જ રશિયા અને યુક્રેન બંને સાથે સંવાદ જાળવી રાખે છે, જેના કારણે તે દુનિયાના કેટલાક ગણ્યા-ગાંઠ્યા દેશોમાં સામેલ છે, જેના સંબંધો બંને પક્ષો સાથે સારા છે. મેરી મિલબેન આજે ભારત-અમેરિકા સંબંધોની એક અનૌપચારિક સાંસ્કૃતિક રાજદૂત માનવામાં આવે છે. તેમણે ગ્લોબલ પ્લેટફોર્મ પર અવારનવાર PM મોદીના નેતૃત્વની પ્રશંસા કરી છે.