સિડની આતંકવાદી હુમલો: પીએમ એન્થોની અલ્બેનીઝે યહૂદી સમુદાયની માફી માંગી, સુરક્ષાની ખાતરી આપી

ઓસ્ટ્રેલિયાના વડા પ્રધાન એન્થોની અલ્બેનીઝે સિડનીના બોન્ડી બીચ પર યહૂદી સમુદાય વિરુદ્ધ થયેલા આતંકવાદી હુમલા માટે સત્તાવાર રીતે માફી માંગી છે.

બોન્ડી બીચ પર આયોજિત હનુક્કાહ (Hanukkah) કાર્યક્રમ દરમિયાન થયેલા ગોળીબારમાં 15 લોકોએ જીવ ગુમાવ્યા હતા. પોલીસે આ હુમલાના કાવતરા અંગે નવી વિગતો જાહેર કરી છે અને પકડાયેલા શંકાસ્પદને જેલના હવાલે કર્યો છે.રાષ્ટ્રને સંબોધતા વડા પ્રધાને આ ઘટના પ્રત્યે ઊંડી જવાબદારી સ્વીકારી હતી. તેમણે જણાવ્યું કે, "વડા પ્રધાન તરીકે, મારા કાર્યકાળ દરમિયાન થયેલા આ અત્યાચારો માટે હું જવાબદારી અનુભવું છું. યહૂદી સમુદાય અને સમગ્ર દેશ જે પીડામાંથી પસાર થઈ રહ્યો છે, તે બદલ હું દિલગીર છું."

તેમણે વધુમાં ઉમેર્યું હતું કે સરકાર યહૂદી ઓસ્ટ્રેલિયનોની સુરક્ષા સુનિશ્ચિત કરવા માટે પ્રતિબદ્ધ છે. "સરકાર યહૂદી નાગરિકોના રક્ષણ માટે સતત કાર્યરત રહેશે. ઓસ્ટ્રેલિયન તરીકે તેમને પોતાની ઓળખ પર ગર્વ કરવાનો, ધર્મનું પાલન કરવાનો, બાળકોને શિક્ષિત કરવાનો અને સમાજમાં સંપૂર્ણ ભાગીદારી નોંધાવવાનો મૂળભૂત અધિકાર છે, જેનું રક્ષણ કરવામાં આવશે."ઇઝરાયલ દ્વારા અગાઉ આપવામાં આવેલી ચેતવણીઓની અવગણના કરવામાં આવી હોવાના આરોપો વચ્ચે પીએમ અલ્બેનીઝે આ માફી માંગી છે. જોકે, તેમણે આ ઘટનાની તપાસ માટે 'રાષ્ટ્રીય રોયલ કમિશન'ની સ્થાપના કરવાનો ઇનકાર કર્યો છે. તેના બદલે, વડા પ્રધાને પૂર્વ જાસૂસી વડા ડેનિસ રિચાર્ડસનના નેતૃત્વમાં 'ફેડરલ રિવ્યૂ' (સંઘીય સમીક્ષા) કરાવવાના નિર્ણયને ટેકો આપ્યો છે.

તેમનું માનવું છે કે ફેડરલ સમીક્ષા દ્વારા તપાસના પરિણામો ઝડપથી મળશે, જેના આધારે ત્વરિત કાર્યવાહી કરી શકાશે.સરકારે જાહેરાત કરી છે કે તેઓ 'હેટ સ્પીચ' (નફરતભર્યા ભાષણ) વિરુદ્ધના કાયદાઓને વધુ કડક બનાવશે. હિંસા માટે ઉશ્કેરણી કરનારા તત્વો વિરુદ્ધ કડક કાયદાકીય પેકેજ તૈયાર કરવા માટે વ્યાપક ચર્ચા શરૂ કરવામાં આવશે.તેમણે સ્પષ્ટ કર્યું કે અધિકારીઓ હાલમાં સક્રિય એવા જૂથોના ભૂતકાળના વર્તનની તપાસ કરી રહ્યા છે. જે જૂથો હિંસા કે નફરતમાં સંડોવાયેલા જણાશે, તેમને નવા કડક કાયદા હેઠળ પ્રતિબંધિત કરવામાં આવશે.