હોલીવુડ અભિનેતા ક્રિશ્ચિયન ઓલિવરનું પ્લેન ક્રેશમાં મોત

જર્મનીમાં જન્મેલા પ્રખ્યાત હોલીવુડ અભિનેતા, ક્રિશ્ચિયન ઓલિવર અને તેની બે પુત્રીઓનું વિમાન દુર્ઘટનામાં મૃત્યુ થયું છે. તે જે નાનકડા વિમાનમાં મુસાફરી કરી રહ્યો હતો, તે ઉડાન ભર્યાની થોડી જ ક્ષણોમાં કેરેબિયન સમુદ્રમાં ક્રેશ થયું હતું.

મીડિયા અહેવાલો અનુસાર, "ધ ગુડ જર્મન" અને "સ્પીડ રેસર" ફિલ્મોમાં જોવા મળેલા ક્રિશ્ચિયન ઓલિવરનું, ગુરુવારે તેની પુત્રીઓ સાથે ખાનગી વિમાન દુર્ઘટનામાં મૃત્યુ થયું હતું. રોયલ સેન્ટ વિન્સેન્ટ અને ગ્રેનેડાઈન્સ પોલીસ ફોર્સે એક નિવેદનમાં જણાવ્યું હતું કે, મૃતકોની ઓળખ ઓલિવર, તેની પુત્રીઓ મદિતા અને એનિક, અને પાઇલટ રોબર્ટ સૅકસ તરીકે કરવામાં આવી હતી.

દુર્ઘટના બાદ માછીમારો અને કોસ્ટ ગાર્ડ તાત્કાલિક ઘટનાસ્થળે પહોંચી ગયા હતા અને ચારેય મૃતદેહોને બહાર કાઢ્યા હતા. પ્લેન ગુરુવારે મધ્યરાત્રિ પછી તરત જ ગ્રેનેડાઇન્સના એક નાના ટાપુ બેકિયા થી સેન્ટ લુસિયા તરફ જઈ રહ્યું હતું. અહેવાલ છે કે, ઓલિવર અહીં તેની છોકરીઓ સાથે નવા વર્ષની રજાઓ મનાવવા આવ્યો હતો.

ક્રિશ્ચિયન ઓલિવરે અત્યાર સુધીમાં 60 થી વધુ ફિલ્મો અને ટીવી સિરીઝ કરી છે. તેમના નિધનના સમાચાર સામે આવ્યા બાદ, ચાહકો આઘાતમાં છે. ચાહકો, ઓલિવર અને તેની પુત્રીઓને શ્રદ્ધાંજલિ આપી રહ્યા છે.