અમરનાથ યાત્રા: 4.51 લાખ ભક્તોએ બાબા બર્ફાનીના કર્યા દર્શન

29 જૂનથી શરૂ થયેલી અમરનાથ યાત્રા શાંતિપૂર્ણ રીતે આગળ વધી રહી છે. અમરનાથ યાત્રાએ ગયા વર્ષનો રેકોર્ડ તોડ્યો છે. છેલ્લા 29 દિવસમાં 4.51 લાખથી વધુ શ્રદ્ધાળુઓએ અમરનાથ યાત્રા કરી છે. શ્રી અમરનાથજી શ્રાઈન બોર્ડ (SASB) ના અધિકારીઓએ જણાવ્યું હતું કે 29 જૂને યાત્રા શરૂ થઈ ત્યારથી, છેલ્લા 29 દિવસમાં 4.51 લાખથી વધુ શ્રદ્ધાળુઓએ પવિત્ર ગુફાની મુલાકાત લીધી છે, જેણે ગયા વર્ષની યાત્રાનો રેકોર્ડ તોડ્યો છે. ગયા વર્ષે, સમગ્ર યાત્રા સમયગાળા દરમિયાન 4.45 લાખ ભક્તોએ ગુફા મંદિરની મુલાકાત લીધી હતી.

શનિવારે લગભગ 8,000 શ્રદ્ધાળુઓએ પવિત્ર ગુફાની મુલાકાત લીધી હતી, જ્યારે રવિવારે જમ્મુના ભગવતી નગર યાત્રી નિવાસથી 1,677 શ્રદ્ધાળુઓનો બીજો સમૂહ ખીણ માટે રવાના થયો હતો.

CAPF અને જમ્મુ અને કાશ્મીર પોલીસ દ્વારા અસાધારણ સુરક્ષા વ્યવસ્થાઓને કારણે આ વર્ષે યાત્રા શાંતિપૂર્ણ અને સુચારૂ રીતે ચાલી રહી છે. ગુફા મંદિરમાં બરફનું માળખું છે જે ચંદ્રના તબક્કાઓ સાથે વધે છે અને પડે છે. ભક્તોનું માનવું છે કે આ બરફની રચના ભગવાન શિવની પૌરાણિક શક્તિઓનું પ્રતીક છે.

અમરનાથની આ ગુફા કાશ્મીર હિમાલયમાં સમુદ્ર સપાટીથી 3,888 મીટરની ઉંચાઈ પર સ્થિત છે. ભક્તો પરંપરાગત દક્ષિણ કાશ્મીર પહેલગામ માર્ગ અથવા ઉત્તર કાશ્મીર બાલટાલ માર્ગ દ્વારા ગુફા મંદિર સુધી પહોંચે છે. આ વર્ષની યાત્રા 52 દિવસ પછી 19 ઓગસ્ટના રોજ શ્રાવણ પૂર્ણિમા અને રક્ષાબંધન પર્વ સાથે પૂર્ણ થશે.