આંધ્રપ્રદેશના મુખ્યમંત્રી ચંદ્રબાબુ નાયડુ આજે કાર્યભાર સંભાળશે

આંધ્રપ્રદેશના મુખ્યમંત્રી એન ચંદ્રબાબુ નાયડુ ગુરુવારે એટલે કે આજે ચાર્જ સંભાળશે. ચંદ્રાબાબુ નાયડુ લગભગ 4.41 વાગ્યે અમરાવતી રાજ્ય સચિવાલયમાં ચાર્જ સંભાળશે. આ સાથે તે પાંચ ફાઇલો પર પણ હસ્તાક્ષર કરશે જેમાં મેગા DSC નોટિફિકેશન, જમીન માલિકી અધિનિયમને રદ્દ કરવા અને લાભાર્થીઓને આપવામાં આવતા સામાજિક પેન્શનને વધારીને 4,000 રૂપિયા પ્રતિ માસ કરવાનો સમાવેશ થાય છે. મુખ્યમંત્રી કૌશલ વસ્તીગણતરી અને અન્ના કેન્ટીનને પુનઃજીવિત કરવા સંબંધિત ફાઈલોને પણ મંજૂરી આપશે.

ચંદ્રબાબુ નાયડુએ બુધવારે વિજયવાડામાં એક કાર્યક્રમમાં પ્રધાનમંત્રી નરેન્દ્ર મોદી અને રાષ્ટ્રીય લોકતાંત્રિક ગઠબંધન (NDA) ના અન્ય નેતાઓની હાજરીમાં આંધ્રપ્રદેશના 18મા મુખ્ય પ્રધાન તરીકે શપથ લીધા. મુખ્યમંત્રીની સાથે 24 સભ્યોના મંત્રીમંડળે પણ શપથ લીધા હતા. જેમાં તેલુગુ દેશમ પાર્ટી, જનસેના પાર્ટી અને બીજેપીના ધારાસભ્યો સામેલ છે. આંધ્રના રાજ્યપાલ એસ અબ્દુલ નઝીરે મંત્રીઓને પદના શપથ લેવડાવ્યા હતા.

આ પહેલા ચંદ્રબાબુ  નાયડુએ તેમના પરિવાર સાથે તિરુમાલાના શ્રીવરી મંદિરમાં પૂજા કરી હતી. સીએમ નાયડુ બુધવારે સાંજે તિરુમાલા પહોંચ્યા, જ્યાં મંદિરના અધિકારીઓ દ્વારા તેમનું ઉષ્માભર્યું સ્વાગત કરવામાં આવ્યું. મુખ્યમંત્રીના પત્ની નારા ભુવનેશ્વરી, તેમના પુત્ર અને રાજ્ય મંત્રી નારા લોકેશ, લોકેશના પત્ની નારા બ્રહ્માણી અને તેમના પુત્ર નાયડુ સાથે તિરુમાલા ખાતે આવ્યા હતા. નોંધનીય છે કે નાયડુ આંધ્રના મુખ્યમંત્રી તરીકે ચોથી વખત અને 2014માં રાજ્યના વિભાજન પછી બીજી વખત ચાર્જ સંભાળી રહ્યા છે. નાયડુ આંધ્રપ્રદેશના વિભાજન પહેલા 1995માં પ્રથમ વખત આંધ્રપ્રદેશના મુખ્યમંત્રી બન્યા હતા અને 2004 સુધી સતત નવ વર્ષ સુધી રાજ્યનું નેતૃત્વ કર્યું હતું.