આવતીકાલે કૂચ બિહારમાં PM મોદી ચૂંટણી રેલીને કરશે સંબોધિત

પ્રધાનમંત્રી નરેન્દ્ર મોદી રવિવારે પશ્ચિમ બંગાળના કૂચ બિહારમાં ચૂંટણી રેલીને સંબોધિત કરશે. આ રેલી ઐતિહાસિક રાસમેલા મેદાનમાં યોજાશે અને જિલ્લામાં કડક સુરક્ષા વ્યવસ્થા કરવામાં આવી છે.

આ સંદર્ભમાં, પ્રધાનમંત્રીની સુરક્ષા ટીમ અને સ્પેશિયલ પ્રોટેક્શન ગ્રુપ (SPG) ના અધિકારીઓ સુરક્ષા વ્યવસ્થાની સમીક્ષા કરવા માટે કૂચ બિહાર પહોંચ્યા છે. કૂચ બિહાર એરપોર્ટ પર સેનાના હેલિકોપ્ટરનું ટ્રાયલ લેન્ડિંગ પણ કરવામાં આવ્યું હતું.

વહીવટી સૂત્રોના જણાવ્યા અનુસાર, પ્રધાનમંત્રી મોદી રવિવારે બપોરે 3 વાગ્યાની આસપાસ કૂચ બિહાર એરપોર્ટ પર પહોંચશે અને રાસમેલા મેદાન ખાતે રેલી સ્થળ સુધી રોડ માર્ગે જશે.

રાજ્ય અને જિલ્લા પોલીસના વરિષ્ઠ અધિકારીઓ તૈયારીઓનું સતત નિરીક્ષણ કરી રહ્યા છે.

ભાજપના નેતાઓના જણાવ્યા અનુસાર, કૂચ બિહાર અને અલીપુરદુઆર જિલ્લાની 13 વિધાનસભા બેઠકોના ઉમેદવારોના સમર્થનમાં આ રેલીનું આયોજન કરવામાં આવી રહ્યું છે. કાર્યકર્તાઓ અને સમર્થકો માટે બેઠક વ્યવસ્થા સ્થળ પર ત્રણ સ્તરોમાં કરવામાં આવી છે. વડાપ્રધાન મોદીની આ રેલીને લઈને ઉત્તર બંગાળના રાજકારણમાં ઘણી ગતિવિધિઓ જોવા મળી રહી છે.