ઉત્તરાખંડમાં મૃત્યુ પામેલ 7 ગુજરાતીઓના મૃતદેહ ટૂંક સમયમાં પહોંચશે માદરે વતન

ઈજાગ્રસ્તોને યોગ્ય સારવાર મળી રહે તે માટે મુખ્યમંત્રી ભૂપેન્દ્ર પટેલ અને પીએમઓ કાર્યાલય સતત સંપર્કમાં

ઉતરાખંડના ઉત્તરકાશી જિલ્લામાં ગંગોત્રી નેશનલ હાઇવે પર એક બસ ખીણમાં પડી જતાં 7 ગુજરાતી પ્રવાસીઓના મૃત્યુ થયા છે, જ્યારે આ દુર્ઘટનામાં 27 લોકો ઇજાગ્રસ્ત થયા છે. તેમને સારવાર માટે હોસ્પિટલ ખસેડાયા છે. ડિઝાસ્ટર ઓપરેશન સેન્ટર દ્વારા પ્રાપ્ત જાણકારી અનુસાર બસમાં કુલ 35 લોકો સવાર હતા. આ બસ ગંગોત્રી ધામથી પરત આવી રહી હતી ત્યારે ખીણમાં ખાબકી હતી.

મુખ્યમંત્રી ભૂપેન્દ્ર પટેલે ટ્વીટ કરી દુર્ઘટના અંગે દુ:ખ વ્યકત કર્યું હતું. તેમણે કહ્યું હતું કે, ગુજરાત સરકાર આ ઘટનાને લઈને ઉત્તરાખંડ સરકાર સાથે સતત સંપર્કમાં છે. તથા રાહત કમિશનર આલોક પાંડેએ જણાવ્યું છે કે, આ  દુર્ઘટનાગ્રસ્ત થયેલ ગુજરાતી પ્રવાસીઓની જાણકારી અને વિગતો માટે સ્ટેટ ઇમરજન્સી ઓપરેશન સેન્ટરના ફોન નંબર- 079-23251900 પર સંપર્ક કરી શકાશે. તેમજ તેમણે જણાવ્યું કે, તમામ મૃતકોને એર લીફ્ટ કરી વતન પરત લાવવા ગુજરાત સરકારે વ્યવસ્થા કરી છે.