ઉપરાષ્ટ્રપતિ હૈદરાબાદમાં 'એક ભારત શ્રેષ્ઠ ભારત' પર આયોજિત પ્રદર્શનનું કરશે ઉદ્ઘાટન

દેશના ઉપ-રાષ્ટ્રપતિ એમ. વેંકૈયા નાયડુ આજ તારીખ 12 મી ડિસેમ્બરના રોજ હૈદરાબાદમાં 'એક ભારત - શ્રેષ્ઠ ભારત' પર યોજાનાર એક પ્રદર્શનનું ઉદ્ઘાટન કરશે. આ પ્રદર્શન હરિયાણા અને તેલંગાણા જેવા એકરૂપ રાજ્યોના કલા સ્વરૂપો, ભોજન, તહેવારો, સ્મારકો, પ્રવાસન સ્થળો વગેરે જેવા વિવિધ રસપ્રદ પાસાઓને પ્રકાશિત કરશે. આ પ્રદર્શનનું આયોજન માહિતી અને પ્રસારણ મંત્રાલયના પ્રાદેશિક આઉટરીચ બ્યુરો દ્વારા કરવામાં આવ્યું છે. આ પ્રદર્શન પોટી શ્રીરામુલુ તેલુગુ યુનિવર્સિટી કેમ્પસ, નામપલ્લી, હૈદરાબાદ ખાતે આજથી આગામી તારીખ 14 મી ડિસેમ્બર દરમિયાન જોવા માટે ખુલ્લું મુકવામાં આવશે.
એક ભારત - શ્રેષ્ઠ ભારત કાર્યક્રમ એ રાષ્ટ્રીય અખંડિતતાની ભાવનાને પ્રોત્સાહન આપવા અને આપણા દેશના લોકો વચ્ચે ભાવનાત્મક બંધનને મજબૂત કરવા માટે સરકાર દ્વારા હાથ ધરવામાં આવેલી એક અનોખી પહેલ છે. આઝાદી પછી દેશના એકીકરણમાં મહત્ત્વપૂર્ણ ભૂમિકા ભજવનાર સરદાર વલ્લભભાઈ પટેલની 140 મી જન્મજયંતી નિમિત્તે 31 ઓક્ટોબર 2015 ના રોજ પ્રધાનમંત્રી નરેન્દ્ર મોદી દ્વારા એક ભારત - શ્રેષ્ઠ ભારત (EBSB) કાર્યક્રમની શરૂઆત કરવામાં આવી હતી.
એક ભારત - શ્રેષ્ઠ ભારતનો આ ઉદ્દેશ્ય રાજ્ય કે કેન્દ્રશાસિત પ્રદેશોની જોડી બનાવવાના ખ્યાલ દ્વારા પ્રાપ્ત કરવાનો છે. દેશના દરેક રાજ્ય અને કેન્દ્રશાસિત પ્રદેશ એવા સમયગાળા માટે અન્ય રાજ્ય કે કેન્દ્રશાસિત પ્રદેશ સાથે સંકળાયેલા રહેશે જે દરમિયાન તેઓ ભાષા, સાહિત્ય, ભોજન, તહેવારો, સાંસ્કૃતિક કાર્યક્રમો, પ્રવાસન વગેરેના ક્ષેત્રોમાં એકબીજા સાથે સંરચિત ભાગીદારી કરશે. વર્તમાન યોજના હેઠળ, તેલંગણા રાજ્યને હરિયાણા સાથે જોડી દેવામાં આવ્યું છે. બંને રાજ્યો દ્વારા ઉપરોક્ત વિવિધ ક્ષેત્રોમાં ઘણી પ્રવૃત્તિઓ હાથ ધરવામાં આવશે. જેમ કે બંને ભાષાઓમાં કી-વર્ડ્સ શીખવા, ભાગીદાર રાજ્યના લોકનૃત્યોનું આયોજન કરવું, અન્ય રાજ્યની વાનગીઓ તૈયાર કરવી, પ્રવાસન પ્રોત્સાહન પ્રવૃત્તિઓ હાથ ધરવી વગેરે.