કેન્દ્રીય કેબિનેટે ફાસ્ટ ટ્રેક સ્પેશિયલ કોર્ટને વધુ ત્રણ વર્ષ માટે લંબાવવાની મંજૂરી આપી

કેન્દ્રીય કેબિનેટે ફાસ્ટ ટ્રેક સ્પેશિયલ કોર્ટને વધુ ત્રણ વર્ષ માટે ચાલુ રાખવાની મંજૂરી આપી છે. આ યોજના હવે રૂ. 1952 કરોડથી વધુની રકમ સાથે 31 માર્ચ 2026 સુધી ચાલુ રહેશે. કેન્દ્રનો હિસ્સો નિર્ભયા ફંડમાંથી આપવામાં આવશે. આ યોજના 2019 માં શરૂ કરવામાં આવી હતી. સ્પેશિયલ કોર્ટની રચના ઝડપી ન્યાય આપવા,પીડિતોને તાત્કાલિક રાહત આપવા અને જાતીય અપરાધીઓ માટે નિવારક માળખાને મજબૂત કરવા માટે કરવામાં આવી છે. આ યોજના લૈંગિક ગુનાઓ અને મહિલાઓ સામેની હિંસા દૂર કરવા તેમજ બળાત્કાર અને POCSO એક્ટના કેસોની પેન્ડન્સીમાં નોંધપાત્ર ઘટાડો કરવા માટેની દેશની પ્રતિબદ્ધતાને પ્રતિબિંબિત કરે છે. વધારે સારી સુવિધાઓ અને ઝડપી ટ્રાયલ દ્વારા જાતીય અપરાધોનો ભોગ બનેલા લોકો માટે ન્યાયની ઝડપી પહોંચ સુનિશ્ચિત કરવાનો પણ તેનો હેતુ છે.

કેન્દ્રીય માહિતી અને પ્રસારણ મંત્રી અનુરાગ ઠાકુરે જણાવ્યું હતું કે, કેબિનેટે 9 લાઇન મંત્રાલયો દ્વારા 11 મહત્વપૂર્ણ કાર્યક્રમો પર ધ્યાન કેન્દ્રિત કરવા માટે પ્રધાનમંત્રી આદિવાસી આદિવાસી ન્યાય મહા અભિયાનને પણ મંજૂરી આપી છે. કુલ રૂ. 24,104 કરોડના ખર્ચ સાથે આ યોજનાને મંજૂરી આપવામાં આવી છે.