કેન્દ્ર સરકારનો ઇન્ડિગોને કડક આદેશ, મુસાફરોને તાત્કાલિક રિફંડ પરત કરો

ઇન્ડિગોએ રદ થયેલી અથવા મોડી પડેલી ફ્લાઇટ્સમાં મુસાફરોના સામાનને શોધી કાઢે અને 48 કલાકની અંદર તેમના સરનામે પહોંચાડવાનો કેન્દ્ર સરકારનો આદેશ

નાગરિક ઉડ્ડયન મંત્રાલયે શનિવારે ઇન્ડિગો એરલાઇન્સને વિલંબ કર્યા વિના તમામ પેસેન્જર રિફંડ જારી કરવાનો આદેશ આપ્યો. મંત્રાલયે કહ્યું કે, રદ કરાયેલી અને ડીલે ફ્લાઇટ્સ માટે રિફંડ પ્રક્રિયા રવિવારે રાત્રે 8 વાગ્યા સુધીમાં પૂર્ણ કરવામાં આવે. વધુમાં, એરલાઇનને ખાતરી કરવા માટે કહેવામાં આવ્યું છે કે જે મુસાફરોની મુસાફરી યોજનાઓ રદ્દ કરવામાં આવી છે અથવા પ્રભાવિત થઈ છે તેમની પાસેથી કોઈ રિશેડ્યુલિંગ ચાર્જ વસૂલવામાં ન આવે. મંત્રાલયે સ્પષ્ટતા કરી કે, રિફંડ પ્રક્રિયામાં કોઈપણ વિલંબ અથવા નિયમોનું પાલન ન કરવા પર તાત્કાલિક નિયમનકારી કાર્યવાહી કરવામાં આવશે.

નાગરિક ઉડ્ડયન મંત્રાલયનો કડક આદેશ 

મંત્રાલયે એ પણ નિર્દેશ આપ્યો કે, ઇન્ડિગોએ રદ થયેલી અથવા મોડી પડેલી ફ્લાઇટ્સમાં મુસાફરોના સામાનને શોધી કાઢે અને 48 કલાકની અંદર તેમના સરનામે પહોંચાડે. એરલાઇનને ટ્રેકિંગ અને ડિલિવરીના સમયપત્રક અંગે મુસાફરો સાથે સ્પષ્ટ અને સમયસર વાતચીત જાળવવાનો નિર્દેશ આપવામાં આવ્યો છે. હાલના મુસાફરોના અધિકાર નિયમો હેઠળ જો જરૂરી હોય તો વળતર આપવાનું પણ ફરજિયાત કરવામાં આવ્યું છે.

મુસાફરોની સુવિધા અને ફરિયાદ નિવારણ સુનિશ્ચિત કરવા માટે મંત્રાલયે ઇન્ડિગોને સમર્પિત મુસાફર સહાય અને રિફંડ સુવિધા કેન્દ્રો સ્થાપવાનો નિર્દેશ આપ્યો. આ કોષો અસરગ્રસ્ત મુસાફરોનો સંપર્ક કરશે અને ખાતરી કરશે કે તેમને રિફંડ અને અન્ય મુસાફરી વ્યવસ્થા માટે વારંવાર ફોલો-અપની જરૂર ન પડે. મંત્રાલયે કહ્યું કે, જ્યાં સુધી કામગીરી સંપૂર્ણપણે સ્થિર ન થાય ત્યાં સુધી ઓટોમેટિક રિફંડ સિસ્ટમ સક્રિય રહેશે.

નાગરિક ઉડ્ડયન મંત્રાલયે કહ્યું કે, આ વિક્ષેપ દરમિયાન મુસાફરોના અધિકારોનું રક્ષણ કરવા માટે એરલાઇન્સ, એરપોર્ટ, સુરક્ષા એજન્સીઓ અને તમામ કાર્યકારી હિસ્સેદારો સાથે સતત સંકલન જાળવવામાં આવી રહ્યું છે.