ગૃહમંત્રી અમિત શાહ છત્તીસગઢના જગદલપુરમાં ‘સેન્ટ્રલ ઝોનલ કાઉન્સિલ’ ની બેઠકની કરશે અધ્યક્ષતા

ગૃહમંત્રી અમિત શાહ છત્તીસગઢના જગદલપુરમાં ‘સેન્ટ્રલ ઝોનલ કાઉન્સિલ’ ની બેઠકની કરશે અધ્યક્ષતા

કેન્દ્રીય ગૃહ અને સહકારિતા મંત્રી અમિત શાહ આજે છત્તીસગઢના નક્સલ પ્રભાવિત બસ્તર જિલ્લાના વિભાગીય મુખ્યાલય જગદલપુર ખાતે ‘સેન્ટ્રલ ઝોનલ કાઉન્સિલ’ (મધ્ય પ્રાદેશિક પરિષદ) ની એક મહત્વપૂર્ણ બેઠકની અધ્યક્ષતા કરશે. આ ઉચ્ચ સ્તરીય બેઠકમાં આંતર-રાજ્ય સહયોગ, સુરક્ષા અને વિકાસલક્ષી મુદ્દાઓ પર વ્યાપક ચર્ચા કરવામાં આવશે.

4 રાજ્યોના મુખ્યમંત્રીઓ અને વરિષ્ઠ અધિકારીઓનો જમાવડો

આ બેઠક કેન્દ્રીય અને પ્રાદેશિક સ્તરે રાજ્યો વચ્ચેના સમન્વયને મજબૂત કરવાના હેતુથી યોજાઈ રહી છે, જેમાં મુખ્યત્વે બેઠકમાં છત્તીસગઢ, મધ્યપ્રદેશ, ઉત્તરપ્રદેશ અને ઉત્તરાખંડના મુખ્યમંત્રીઓ ખાસ હાજર રહેશે. 

વરિષ્ઠ વહીવટી અધિકારીઓ: 

આ ચારેય રાજ્યોના મુખ્ય સચિવો અને ગૃહ વિભાગના વરિષ્ઠ અધિકારીઓ પણ ગૃહમંત્રી સાથેની ચર્ચામાં સામેલ થશે.

બેઠકમાં ખાસ કરીને સરહદી વિવાદો, માળખાકીય સુવિધાઓનો વિકાસ અને નક્સલવાદ સામેની સંયુક્ત વ્યુહરચના જેવા સંવેદનશીલ મુદ્દાઓ પર મંથન કરવામાં આવે તેવી શક્યતા છે.

ગઈકાલે નેતાનાર ગામમાં ‘જાહેર સેવા કેન્દ્ર’ નું કર્યું ઉદ્ઘાટન

આ અગાઉ ગઈકાલે, ગૃહમંત્રી અમિત શાહે બસ્તર જિલ્લાના અંતરિયાળ વિસ્તારમાં આવેલા નેતાનાર ગામની મુલાકાત લીધી હતી. પ્રશાસનને સામાન્ય જનતાની વધુ નજીક લાવવાના પ્રયાસરૂપે તેમણે ત્યાં એક નવા જાહેર સેવા કેન્દ્ર (Common Service Centre - CSC) નું સત્તાવાર ઉદ્ઘાટન કર્યું હતું. આ કેન્દ્રના માધ્યમથી સ્થાનિક આદિવાસી અને ગ્રામીણ નાગરિકોને સરકારી યોજનાઓનો લાભ અને ડિજિટલ સેવાઓ સીધી તેમના ગામમાં જ મળી રહેશે.