ઠંડી, ધુમ્મસ અને વરસાદ: દેશના ઘણા ભાગોમાં આજે મિશ્ર હવામાન

ઠંડી, ધુમ્મસ અને વરસાદ: દેશના ઘણા ભાગોમાં આજે મિશ્ર હવામાન; દિલ્હીમાં હવા ગુણવત્તા 'ખૂબ જ ખરાબ'

હવામાન વિભાગ (IMD) દ્વારા આજે દેશના વિવિધ રાજ્યો માટે અલગ-અલગ પ્રકારની હવામાન આગાહીઓ જાહેર કરવામાં આવી છે. એક તરફ જ્યાં કેટલાક રાજ્યોમાં ઠંડીનો પ્રકોપ જોવા મળશે, ત્યાં બીજી તરફ કેટલાક દરિયાકાંઠાના વિસ્તારોમાં વરસાદ અને વીજળી પડવાની શક્યતા છે.

ઠંડી અને ધુમ્મસની આગાહી

હવામાન વિભાગે આજે છત્તીસગઢ, મધ્યપ્રદેશ, ઓડિશા અને વિદર્ભના કેટલાક ભાગોમાં ઠંડી પડવાની આગાહી કરી છે. દેશના પૂર્વોત્તર રાજ્યો અને પહાડી વિસ્તારોમાં આગામી ચાર દિવસ સુધી ગાઢ ધુમ્મસ રહેવાની સંભાવના છે. જેમાં આસામ, મેઘાલય, હિમાચલ પ્રદેશ, નાગાલેન્ડ, મણિપુર, મિઝોરમ, ત્રિપુરા અને ઓડિશાના કેટલાક ભાગોનો સમાવેશ થાય છે.

વરસાદ અને વાવાઝોડાની શક્યતા

આંદામાન અને નિકોબાર ટાપુઓ, તેમજ દક્ષિણ ભારતના રાજ્યો જેમ કે તમિલનાડુ, પુડુચેરી અને કરાઈકલના વિસ્તારોમાં આજે વીજળીના કડાકા સાથે વાવાઝોડાની શક્યતા વ્યક્ત કરવામાં આવી છે.

દિલ્હીમાં હવા ગુણવત્તા 'ખૂબ જ ખરાબ'

દેશની રાજધાની દિલ્હીમાં હવાની ગુણવત્તા (Air Quality) હજુ પણ ચિંતાજનક સ્તરે નોંધાઈ છે. કેન્દ્રીય પ્રદૂષણ નિયંત્રણ બોર્ડ (CPCB) અનુસાર, આજે સવારે 7 વાગ્યે રાષ્ટ્રીય રાજધાનીનો સરેરાશ હવા ગુણવત્તા સૂચકાંક (AQI) 318 નોંધાયો હતો, જે 'ખૂબ જ ખરાબ' (Very Poor) શ્રેણીમાં આવે છે. આ સ્થિતિને ધ્યાનમાં રાખીને, હવામાનની આગાહીવાળા વિસ્તારોમાં લોકોને સાવચેતી રાખવા અને જરૂરી પગલાં લેવાની અપીલ કરવામાં આવી છે.