દિલ્હી અને ઈન્દોરમાં આગનું તાંડવ, 3 બાળકો સહિત કુલ 13 નાગરિકોના કરુણ મોત

આજે બુધવારની વહેલી સવારે જ્યારે લોકો મીઠી નિદ્રા માણી રહ્યા હતા, ત્યારે કાળમુખી આગે અનેક પરિવારોનો માળો વિખેરી નાખ્યો છે. દિલ્હીના પાલમ અને ઈન્દોરના તિલક નગરમાં સર્જાયેલી આ બે અલગ-અલગ ઘટનાઓમાં કુલ ૧૩ લોકોના મોત નીપજ્યા છે.

1. દિલ્હીના પાલમમાં મોતનું તાંડવ
દિલ્હીના પાલમ વિસ્તારમાં એક 4 માળની મિશ્ર ઉપયોગ (કોમર્શિયલ અને રહેણાંક) ધરાવતી ઈમારતમાં આગે વિકરાળ સ્વરૂપ ધારણ કર્યું હતું. 

જીવ બચાવવા મોતની છલાંગ:
આગ એટલી ઝડપથી ફેલાઈ હતી કે ઉપરના માળે રહેતા લોકોને બહાર નીકળવાનો રસ્તો મળ્યો નહોતો. જીવ બચાવવા માટે બે વ્યક્તિઓએ ત્રીજા અને ચોથા માળેથી નીચે છલાંગ લગાવી હતી, જેમના હાડકાં તૂટી ગયા છે અને હાલ હોસ્પિટલમાં જીવન-મરણ વચ્ચે ઝોલાં ખાઈ રહ્યા છે.

3 નિર્દોષ બાળકોના મોત: સૌથી વધુ આઘાતજનક બાબત એ છે કે મૃતકોમાં ૩ માસૂમ બાળકોનો સમાવેશ થાય છે. ધુમાડાના ગોટા અને શ્વાસ રૂંધાવાને કારણે મોટાભાગના લોકોના મોત નીપજ્યા છે.

કાર્પેટ અને કોસ્મેટિક્સનો જથ્થો: ઈમારતના બેઝમેન્ટ અને પહેલા બે માળ પર કાપડ અને કેમિકલયુક્ત કોસ્મેટિક્સનો મોટો જથ્થો હોવાથી આગ 'ફ્યુઅલ' ની જેમ ભભૂકી ઉઠી હતી. ફાયર બ્રિગેડની ૨૫ ગાડીઓને આગ ઓલવતા કલાકોનો સમય લાગ્યો હતો.

2. ઈન્દોરમાં 'EV ચાર્જિંગ' બન્યું કાળ:
ઈન્દોરના તિલક નગર વિસ્તારમાં રહેતા વેપારી મનોજભાઈના ત્રણ માળના મકાનમાં સર્જાયેલી ઘટના ટેકનોલોજીના જોખમો તરફ આંગળી ચીંધે છે.

શોર્ટ સર્કિટ અને સ્ફોટ: રાત્રે ઘરની બહાર પાર્ક કરેલા ઇલેક્ટ્રિક વ્હીકલને ચાર્જિંગમાં મૂકવામાં આવ્યું હતું. વહેલી સવારે બેટરીમાં શોર્ટ સર્કિટ થયા બાદ જોરદાર ધડાકા સાથે આગ લાગી હતી. આ આગ સીધી ઘરના પ્રવેશદ્વાર અને દાદર સુધી પહોંચી ગઈ, જેના કારણે પરિવાર માટે બહાર નીકળવાનો માર્ગ બંધ થઈ ગયો હતો.

ઊંઘમાં જ અંતિમ શ્વાસ: કલેક્ટર શિવમ વર્માએ પુષ્ટિ કરી છે કે ઘરમાં ૧૦ લોકો હાજર હતા. આગના ધુમાડા અને ગરમીને કારણે ૬ લોકોએ પલંગમાં જ દમ તોડી દીધો હતો. પાડોશીઓએ સીડી લગાવીને ૩ લોકોને બચાવી લીધા હતા, પરંતુ ૬ સભ્યોને બચાવવામાં મોડું થઈ ગયું હતું.