પેપરલીક વિરોધી કાયદો અમલમાં આવ્યો, 5 વર્ષની જેલ અને 1 કરોડ રૂપિયા સુધીના દંડની જોગવાઈ

સ્પર્ધાત્મક પરીક્ષાઓના પ્રશ્નપત્ર લીક થવાના કિસ્સાઓને કડક રીતે રોકવા માટે શુક્રવારે મોડી રાત્રે પેપર લીક એક્ટનો અમલ કરવામાં આવ્યો હતો. આ કાયદો આ વર્ષે ફેબ્રુઆરીમાં પસાર કરવામાં આવ્યો હતો. તેને 'પબ્લિક એક્ઝામિનેશન એક્ટ 2024' નામ આપવામાં આવ્યું છે. તેના અમલીકરણ સાથે, સ્પર્ધાત્મક પરીક્ષાઓમાં અયોગ્ય માધ્યમોનો ઉપયોગ કરવા બદલ 3થી 5 વર્ષની જેલ અને 10 લાખ રૂપિયા સુધીના દંડની જોગવાઈ કરવામાં આવી છે. સંગઠિત રીતે આવો ગુનો કરવા બદલ 1 કરોડ રૂપિયા સુધીના દંડની જોગવાઈ છે.

NEET પેપર લીક અને UGC-NET પરીક્ષા રદ કરવાને લઈને દેશભરમાં વિવાદ ઉભો થયો છે. દરમિયાન, સરકારે એક મોટો નિર્ણય લીધો છે અને પેપર લીકને રોકવા માટે કડક કાયદો અમલમાં મૂક્યો છે. કેન્દ્ર સરકારે 'પબ્લિક એક્ઝામિનેશન એક્ટ 2024'ને નોટિફાઇ કર્યું છે. આ કાયદાનો હેતુ સ્પર્ધાત્મક પરીક્ષાઓમાં પેપર લીક અને નકલ અટકાવવાનો છે. આ હેઠળ, 15 પ્રવૃત્તિઓની ઓળખ કરવામાં આવી છે, જેમાંથી કોઈપણમાં સામેલ થવા પર જેલ અથવા પ્રતિબંધ અથવા ભારે દંડની સજા થઈ શકે છે.

પેપર લીક કાયદાના અવકાશમાં તે તમામ પરીક્ષાઓનો સમાવેશ થાય છે જે જાહેર પરીક્ષા સંસ્થાઓ દ્વારા અથવા કેન્દ્ર સરકાર દ્વારા માન્યતા પ્રાપ્ત સંસ્થાઓ દ્વારા લેવામાં આવે છે. આમાં ઘણી મોટી પરીક્ષાઓનો સમાવેશ થાય છે. કાયદાના અવકાશમાં UPSC, SSC, રેલ્વે સ્પર્ધાત્મક પરીક્ષાઓ, બેંકિંગ ભરતી પરીક્ષાઓ અને નેશનલ ટેસ્ટિંગ એજન્સી (NTA) દ્વારા લેવામાં આવતી તમામ કમ્પ્યુટર-આધારિત પરીક્ષાઓનો સમાવેશ થાય છે.