પ્રધાનમંત્રી નરેન્દ્ર મોદીના જાહેર જીવનના 25 વર્ષ પૂર્ણ, પ્રધાનમંત્રી સંબોધશે ‘વિકસિત ભારત સંકલ્પ સભા

ગુજરાતમાં ‘સેવા જ્યોત યાત્રા’નું આયોજન

પ્રધાનમંત્રી નરેન્દ્ર મોદીના 25 વર્ષના દીર્ઘકાલીન અને સફળ જનસેવા કાર્યકાળની ઐતિહાસિક ઉજવણી નિમિત્તે આજે દેશભરમાં વિશેષ કાર્યક્રમોનું આયોજન કરવામાં આવ્યું છે. આ અવસરે વડાપ્રધાન મોદી આજે બુધવારે સવારે વર્ચ્યુઅલ માધ્યમથી દેશને સંબોધિત કરશે અને નાગરિકોને 'વિકસિત ભારત 2047' માટેના સંકલ્પની શપથ લેવડાવશે. ગુજરાત ભાજપ દ્વારા આ વિશેષ દિવસને યાદગાર બનાવવા માટે તમામ જિલ્લાઓ અને મહાનગરોમાં 'સેવા જ્યોતિ કલશ યાત્રા' નું આયોજન કરાયું છે. 

પ્રધાનમંત્રીના સંબોધન પછી, સ્થાનિક નેતાઓ 'સેવા જ્યોતિ' પ્રગટાવશે, ત્યારબાદ દરેક જિલ્લા અને મહાનગર વિસ્તારમાં નિર્ધારિત સ્થળોએ 'સેવા જ્યોતિ કળશ યાત્રા' શરૂ થશે.

ગુજરાતના મુખ્યમંત્રી ભૂપેન્દ્ર પટેલ અમદાવાદમાં રિવરફ્રન્ટ હાઉસ નજીક પૂજ્ય પ્રમુખ સ્વામી માર્ગ-રિવરફ્રન્ટ રોડ ખાતે યોજાનાર કાર્યક્રમમાં હાજરી આપશે. પ્રદેશ ભાજપ પ્રમુખ જગદીશ વિશ્વકર્મા સાબરકાંઠા જિલ્લાના ન્યુ સિવિલ હોસ્પિટલ રોડ પર આર્ટ્સ એન્ડ કોમર્સ કોલેજ ખાતે યોજાનાર કાર્યક્રમમાં હાજરી આપશે.

નાયબ મુખ્યમંત્રી હર્ષ સંઘવી ગાંધીનગર જિલ્લાના રૂપાલ ગામમાં શ્રી વરદાયિની માતાજી મંદિર ખાતે યોજાનાર કાર્યક્રમમાં ભાગ લેશે. રાજ્ય ભાજપના મહામંત્રી અનિરુદ્ધ દવે, પ્રશાંત કોરાટ, અજય બ્રહ્મભટ્ટ અને હિતેન્દ્ર સિંહ ચૌહાણ રાજકોટ, સુરત, અમદાવાદ અને વડોદરામાં યોજાનાર કાર્યક્રમોમાં હાજરી આપશે.

રાજ્યના મંત્રીઓ, ભાજપના અધિકારીઓ, સાંસદો, ધારાસભ્યો, પક્ષના નેતાઓ, કાર્યકરો અને સ્થાનિક રહેવાસીઓ પણ નિર્ધારિત સ્થળોએ યોજાનાર કાર્યક્રમોમાં હાજરી આપે તેવી અપેક્ષા છે.

17 સપ્ટેમ્બરથી શરૂ થયેલી રાષ્ટ્રવ્યાપી 'સેવા સંકલ્પ યાત્રા' બુધવારે ગુજરાતના વડનગર અને ઉત્તર પ્રદેશના વારાણસીમાં સમાપ્ત થશે. આ બે સ્થળો પીએમ મોદીના જન્મસ્થળ અને રાજકીય કારકિર્દી સાથે સંકળાયેલા છે. વડનગરમાં સમાપન કાર્યક્રમમાં ઐતિહાસિક હાટકેશ્વર મહાદેવ મંદિરમાં જલાભિષેક પણ કરવામાં આવશે.