પ્રધાનમંત્રી નરેન્દ્ર મોદી આજે મધ્યપ્રદેશના ચૂંટણી પ્રવાસે, સુરગુજામાં ગજવશે સભા

પ્રધાનમંત્રી નરેન્દ્ર મોદી આજે મધ્યપ્રદેશના ચૂંટણી પ્રવાસે, સુરગુજામાં ગજવશે સભા

લોકસભા ચૂંટણીના બીજા તબક્કામાં પાર્ટીના ઉમેદવારોના સમર્થનમાં પ્રચાર ચાલી રહ્યો છે. આ ક્રમમાં બીજેપીના વરિષ્ઠ નેતા અને પ્રધાનમંત્રી નરેન્દ્ર મોદી છત્તીસગઢ અને મધ્યપ્રદેશમાં 3 સ્થળ પર સભાને સંબોધશે. 

PMની સાગર અને હરદામાં સભા
 પ્રધાનમંત્રી નરેન્દ્ર મોદી આજે સવારે 11.45 કલાકે છત્તીસગઢના સુરગુજામાં પાર્ટીની જાહેર સભાને સંબોધિત કરશે. ચૂંટણી વિશ્લેષકોનું કહેવું છે કે આ વખતે વડાપ્રધાન લોકસભા ચૂંટણીમાં 400ને પાર કરવાના તેમના સંકલ્પને પૂર્ણ કરવા માટે ઝડપથી આગળ વધી રહ્યાં છે. સુરગુજા બાદ પ્રધાનમંત્રી મધ્યપ્રદેશ પહોંચશે.

સાગર અને હરદામાં PM મોદીની જાહેર સભાઓ થશે, જ્યારે ભોપાલમાં તેમનો રોડ શો યોજાશે. આ અંગે બીજેપીના રાજ્ય મીડિયા પ્રભારી આશિષ અગ્રવાલે જણાવ્યું કે વડાપ્રધાન મોદી બપોરે 2 વાગે વિશેષ વિમાન દ્વારા જબલપુરના ડુમના એરપોર્ટ પર પહોંચશે અને અહીંથી હેલિકોપ્ટર દ્વારા રવાના થશે અને બપોરે 2:35 કલાકે સાગર પાસેના બરતુમા હેલિપેડ પહોંચશે. 

PM મોદી બપોરે 2:55 વાગ્યે સાગર જિલ્લાના બરતુમાના સંત રવિદાસ મંદિર પરિસરમાં જનસભાને સંબોધશે. આ પછી તેઓ બપોરે 3.40 કલાકે બારતુમા હેલિપેડથી હેલિકોપ્ટર દ્વારા હરદા જિલ્લા માટે રવાના થશે. વડાપ્રધાન મોદી સાંજે 5:15 કલાકે હરદા જિલ્લાના અબાગાંવ ખુર્દમાં જનસભાને સંબોધિત કરશે.

PM મોદીનો ભોપાલમાં રોડ શો 

વડાપ્રધાન સાંજે 7 વાગ્યે ભોપાલ પહોંચશે અને તેઓ અહીં લગભગ દોઢ કિલોમીટર લાંબો રોડ શો કરશે. પીએમ મોદીના રોડ શોના રૂટ પર બે હજારથી વધુ પોલીસ જવાનો તૈનાત રહેશે. રોડ શો જૂની વિધાનસભાની સામે લાલ બહાદુર શાસ્ત્રીની પ્રતિમાથી શરૂ થશે. અહીંથી વડાપ્રધાન મોદી ખુલ્લા રથ પર સવાર થઈને એપેક્સ સર્કલ સ્થિત મેજર નાનકે પેટ્રોલ પંપ તિરાહા પહોંચશે અને પ્રાદેશિક લોકોને શુભેચ્છા પાઠવશે. 

મધ્યપ્રદેશના મુખ્યમંત્રી ડો.મોહન યાદવે જણાવ્યું કે પ્રધાનમંત્રી મોદીનો રોડ શો એક કિલોમીટરનો રહેશે. રોડ શોમાં 200 થી વધુ સ્ટેજ પર તેમનું અલગ અલગ રીતે સન્માન કરવામાં આવશે. કલાકારો, સંતો અને વિવિધ વર્ગના લોકો પીએમ મોદીનું સ્વાગત કરશે. ભોપાલને દુલ્હનની જેમ સજાવવામાં આવશે. બંગાળી સમાજની બહેનો શંખ નાદ સાથે સ્વાગત કરશે. ઉદ્યોગપતિઓ પણ તેમની સંસ્થાઓ તરફથી વડાપ્રધાનનું સ્વાગત કરશે અને અભિનંદન આપશે. સાંસ્કૃતિક ઝાંખીઓ પણ હશે.

પીએમ મોદીની 20 દિવસમાં પાંચમી મુલાકાત

ઉલ્લેખનીય છે કે લોકસભા ચૂંટણીની આચારસંહિતા લાગુ થયા બાદ વડાપ્રધાન મોદી 7 એપ્રિલે પહેલીવાર જબલપુર આવ્યા હતા અને અહીં રોડ શો કર્યો હતો. આ પછી તેમણે 9 એપ્રિલે બાલાઘાટ, 14 એપ્રિલે નર્મદાપુરમના પિપરિયા અને 19 એપ્રિલે દમોહમાં જનસભાને સંબોધિત કરી હતી. આજે વડાપ્રધાન સાગર, બેતુલ અને ભોપાલ આવી રહ્યા છે. 20 દિવસમાં મધ્યપ્રદેશની આ તેમની પાંચમી મુલાકાત છે.