પ્રધાનમંત્રી નરેન્દ્ર મોદી આજે મહિલા અને બાળ વિકાસ વિભાગના શિખર સંમેલનના સમાપન સત્રને કરશે સંબોધિત

પ્રધાનમંત્રી નરેન્દ્ર મોદી આજે નવી દિલ્હીમાં મહિલા અને બાળ વિકાસ વિભાગના બે દિવસીય શિખર સંમેલનના સમાપન સત્રમાં સામેલ થશે. ગઈકાલે શરૂ થયેલા આ સંમેલનમાં તમામ રાજ્યોનું રાજકીય નેતૃત્વ અને મહિલા તથા બાળ વિકાસ ક્ષેત્ર સાથે જોડાયેલા અધિકારીઓ ભાગ લઈ રહ્યા છે.

પ્રધાનમંત્રીની પરિકલ્પના અનુસાર આયોજિત થઈ રહેલા વિભાગીય શિખર સંમેલનોની શૃંખલામાં આ બીજું સંમેલન છે. તેનો ઉદ્દેશ્ય સહકારી સંઘવાદને મજબૂત કરવાનો, રાષ્ટ્રીય પ્રાથમિકતાઓ પ્રત્યે સામૂહિક જવાબદારીની ભાવનાને પ્રોત્સાહન આપવાનો અને કેન્દ્ર તથા રાજ્યો વચ્ચે વધુ સારો સમન્વય સાધીને લક્ષ્યોની પ્રાપ્તિમાં ઝડપ લાવવાનો છે.

આ શિખર સંમેલન ચાર મુખ્ય થીમ્સ પર ધ્યાન કેન્દ્રિત કરી રહ્યું છે: પોષણ, બાળપણનું શિક્ષણ, બાળ સંરક્ષણ અને મહિલા સલામતી અને સશક્તિકરણ.

વિભાગીય શિખર સંમેલનની આ પહેલ કેન્દ્ર અને રાજ્ય સરકારોના વિવિધ હિસ્સેદારોને પ્રાદેશિક પ્રાથમિકતાઓની ચર્ચા કરવા માટે એક જ પ્લેટફોર્મ પર એકસાથે લાવે છે. શ્રેષ્ઠ પ્રથાઓ શેર કરવા, યોજનાઓના અમલીકરણમાં પડકારોના ઉકેલો શોધવા અને સુશાસન અને સેવા વિતરણને સુધારવા માટે સમયસર પગલાં પર સંમત થવા પર પણ ભાર મૂકવામાં આવી રહ્યો છે.