બ્રિટનમાં આશ્રય ન મળે ત્યાં સુધી શેખ હસીના ભારતમાં જ રહેશે

બાંગ્લાદેશના પૂર્વ પ્રધાનમંત્રી શેખ હસીના હાલ ભારતમાં જ રહેશે. સોમવારે તેમની સરકારના પતન બાદ ભારત સરકારે વચગાળાના સ્ટેની પરવાનગી આપી છે.

 ડેઈલી સને એક રિપોર્ટમાં જણાવાયું છે કે, આ સમયગાળા દરમિયાન ભારત હસીનાને બ્રિટનમાં આશ્રય ન મળે ત્યાં સુધી તમામ સહાય પૂરી પાડશે, 

બ્રિટનમાં તેમનું ટ્રાન્સફર થાય ત્યાં સુધી ભારતમાં તેમના રોકાણને અસ્થાયી ધોરણે મંજૂરી આપવામાં આવી છે.

સરકાર વિરોધને પગલે હસીનાએ સોમવારે પ્રધાનમંત્રી પદેથી રાજીનામું આપ્યું હતું અને તેઓ ભારત થઈને લંડન જવાના છે.

ડેલી સને તેના રિપોર્ટમાં જણાવ્યું છે કે, બાંગ્લાદેશના પૂર્વ પ્રધાનમંત્રીને રાજકીય આશ્રય આપવા અંગે યુકે સરકાર દ્વારા હજુ સુધી કોઈ પુષ્ટિ કરવામાં આવી નથી.

હસીના હાલમાં તેની બહેન રેહાના સાથે બ્રિટનમાં આશ્રય માંગી રહી છે, જે બ્રિટિશ નાગરિક છે.

બાંગ્લાદેશના રાષ્ટ્રપિતા શેખ મુજીબુર રહેમાનની નાની પુત્રી રેહાના શેખ હસીનાની નાની બહેન પણ છે. તેમની પુત્રી ટ્યૂલિપ સિદ્દીક બ્રિટનમાં લેબર પાર્ટી તરફથી સંસદ સભ્ય છે.

દરમિયાન, ભારત સરકારના સૂત્રોએ જણાવ્યું હતું કે નવી દિલ્હી ઢાકામાં ઝડપી ગતિવિધિઓ પર નજીકથી નજર રાખી રહી છે.

ઢાકામાં બાંગ્લાદેશના આર્મી ચીફ જનરલ વકાર-ઉઝ-ઝમાને કહ્યું કે હસીનાએ રાજીનામું આપી દીધું છે અને વચગાળાની સરકાર ચાર્જ સંભાળી રહી છે. "હું તમામ જવાબદારી (દેશ માટે) લઈ રહ્યો છું. કૃપા કરીને સહકાર આપો," 

આર્મી ચીફે કહ્યું કે, તેઓ રાજકીય નેતાઓને મળ્યા અને તેમને કહ્યું કે, સેના કાયદો અને વ્યવસ્થાની જવાબદારી સંભાળશે.

છેલ્લા બે દિવસમાં હસીનાની સરકાર વિરુદ્ધ પ્રદર્શનમાં 100થી વધુ લોકો માર્યા ગયા છે.