ભારતીય મૂળના અજય બંગા વિશ્વ બેંકના આગામી અધ્યક્ષ બનશે

વિશ્વ બેંકના 14મા અધ્યક્ષ તરીકે ચૂંટાયા

ભારતીય-અમેરિકન નાગરિક અને માસ્ટરકાર્ડના ભૂતપૂર્વ CEO અજય બંગા વિશ્વ બેંકના 14મા અધ્યક્ષ તરીકે ચૂંટાયા છે. વિશ્વ બેંકના 25 સભ્યોના એક્ઝિક્યુટિવ બોર્ડે બુધવારે અજય બંગાને પાંચ વર્ષની મુદત માટે તેના અધ્યક્ષ તરીકે ચૂંટ્યા. ભારતમાં જન્મેલા નાણા અને વિકાસ નિષ્ણાત અજય બંગાને આબોહવા પરિવર્તન અને અન્ય વૈશ્વિક કટોકટીને સંબોધવા માટે વિશ્વ બેંકમાં પરિવર્તન લાવવાનું કામ સોંપવામાં આવ્યું છે.

યુએસ પ્રમુખ જો બાઈડન ફેબ્રુઆરીના અંતમાં 63 વર્ષીય અજય બંગાને આ પદ માટે નામાંકિત કર્યા હતા. વિશ્વ બેંકના અધ્યક્ષ તરીકે ડેવિડ માલપાસના સ્થાને બંગા એકમાત્ર દાવેદાર હતા. તેઓ 2 જૂને આ નવી જવાબદારી સંભાળશે.

વિશ્વ બેંકના બોર્ડના સભ્યોએ સોમવારે ચાર કલાક સુધી બંગાનો ઇન્ટરવ્યુ લીધો, ત્યારબાદ તેમની પસંદગી કરવામાં આવી. બોર્ડના 25માંથી 24 સભ્યોએ બાંગાની તરફેણમાં મતદાન કર્યું જ્યારે રશિયાએ ગેરહાજર રહી.