યુદ્ધવિરામ કરારનું ઉલ્લંઘન કરવા બદલ ભારતે પાકિસ્તાનને આપી ચેતવણી

વિક્રમ મિશ્રીએ કહ્યું કે, ભારતીય સશસ્ત્ર દળો આ ઉલ્લંઘનોનો "યોગ્ય અને પર્યાપ્ત જવાબ" આપી રહ્યા છે અને ભારત પરિસ્થિતિને ખૂબ જ ગંભીરતાથી લઈ રહ્યું છે. તેમણે પાકિસ્તાનને આ ઉલ્લંઘનોને રોકવા માટે જરૂરી પગલાં લેવા અને સમગ્ર મામલાને જવાબદારીપૂર્વક સંભાળવા અપીલ કરી.

શનિવારે સાંજે ભારત અને પાકિસ્તાનના ડાયરેક્ટર જનરલ ઓફ મિલિટરી ઓપરેશન્સ (DGMOs) વચ્ચે યુદ્ધવિરામ કરાર પર હસ્તાક્ષર થયાના થોડા કલાકો પછી પાકિસ્તાને વારંવાર તેનું ઉલ્લંઘન કર્યું છે. ભારતના વિદેશ સચિવ વિક્રમ મિશ્રીએ મોડી રાત્રે એક પ્રેસ બ્રીફિંગમાં આ વાતની પુષ્ટિ કરી. તેમણે કહ્યું કે, છેલ્લા કેટલાક કલાકોમાં નિયંત્રણ રેખા (LoC) અને આંતરરાષ્ટ્રીય સરહદ (IB) પર કરારનું અનેક ઉલ્લંઘન થયું છે. વિદેશ સચિવે તેને "આજે થયેલા કરારનું સીધું ઉલ્લંઘન" ગણાવ્યું.

વિક્રમ મિશ્રીએ કહ્યું કે, ભારતીય સશસ્ત્ર દળો આ ઉલ્લંઘનોનો "યોગ્ય અને પર્યાપ્ત જવાબ" આપી રહ્યા છે અને ભારત પરિસ્થિતિને ખૂબ જ ગંભીરતાથી લઈ રહ્યું છે. તેમણે પાકિસ્તાનને આ ઉલ્લંઘનોને રોકવા માટે જરૂરી પગલાં લેવા અને સમગ્ર મામલાને જવાબદારીપૂર્વક સંભાળવા અપીલ કરી.

વિદેશ સચિવે એમ પણ કહ્યું કે, ભારતીય સેના પરિસ્થિતિ પર નજર રાખી રહી છે અને જો આવા ઉલ્લંઘનનું પુનરાવર્તન થશે તો કડક જવાબ આપવા માટે સ્પષ્ટ સૂચનાઓ આપવામાં આવી છે - પછી ભલે તે નિયંત્રણ રેખા પર હોય કે આંતરરાષ્ટ્રીય સરહદ પર. ભારત તરફથી આ કડક પ્રતિક્રિયા એવા સમયે આવી છે જ્યારે બંને દેશો સરહદ પર શાંતિ જાળવવા સંમત થયા હતા, પરંતુ પાકિસ્તાન દ્વારા કરવામાં આવેલા તાજેતરના ઉલ્લંઘનોએ ફરી એકવાર તણાવ વધાર્યો છે.