રાજ્યોના મુખ્યમંત્રીઓ સાથેની PM મોદીની બેઠક 6 કલાક ચાલી, કોરોના સાથે જોડાયેલ વિવિધ બાબતો પર કરાઇ ચર્ચા

સમગ્ર દેશમાં લોકડાઉન અમલી થયાં બાદ ગઇકાલે ફરી પાંચમી વખત પ્રધાનમંત્રી નરેન્દ્ર મોદીએ દરેક રાજ્યોના મુખ્યમંત્રીઓ સાથે વીડિયો કોન્ફરન્સનાં માધ્યમથી બેઠક યોજી હતી. 6 કલાક સુધી ચાલેલી આ બેઠકમાં દેશમાં કોરોના વાઈરસ સાથે જોડાયેલી વિવિધ બાબતો પર ચર્ચા કરવામાં આવી હતી. પ્રધાનમંત્રીએ કોવિડ-19નાં સંક્રમણને આગળ વધતું અટકાવવા અને લોકડાઉનમાંથી તબક્કા વાર બહાર નીકળવા માટે તેમજ આર્થિક ગતિવિધિઓ તેજ કરવાના ઉપાયો પર મુખ્યમંત્રીઓ સાથે વાતચીત કરી હતી. 

પ્રધાનમંત્રી નરેન્દ્ર મોદીએ જણાવ્યું હતું કે, આ સમયે આપણું ફોકસ એ વાત પર હોવું જોઈએ કે, આ સંક્રમણ શહેરોમાંથી ગ્રામ્ય વિસ્તારોમાં ન ફેલાય. પ્રધાનમંત્રીએ વધુમાં ઉમેર્યું હતું કે, કોવિડ-19 બાદની દુનિયા એકદમ બદલાઈ ગઈ છે, અને આપણે તે મુજબ વિચારીને કામ કરવું પડશે. આ ઉપરાંત પ્રધાનમંત્રી નરેન્દ્ર મોદીએ કહ્યું હતું કે, વિવિધ સ્તરે કોવિડ-19ના પડકારને પહોંચી વળવા માટે રાજ્યો અને કેન્દ્ર સરકાર વચ્ચે વધુ પરસ્પર સહયોગથી કામ કરવાની જરૂર છે.