હિટવેવની આશંકાની વચ્ચે PM મોદીએ કરી બેઠક, IMDએ જૂન સુધી કાળઝાળ ગરમીની કરી આગાહી

કાળઝાળ ગરમીની હવામાન વિભાગની આગાહીના પગલે PM મોદીએ પરિસ્થિતિને પહોંચી વળવા તૈયારીઓની સમીક્ષા

નવી દિલ્હી, 12 એપ્રિલ:  હવામાન વિભાગે આ વર્ષે અંગ દઝાડતી ગરમી પડવાની આગાહી કરી છે. જેને જોતા પ્રધાનમંત્રી નરેન્દ્ર મોદીએ ગરમીનો સામનો કરવા માટે કરવામાં આવી રહેલી તૈયારીઓને લઈને ઉચ્ચ સ્તરીય સમીક્ષા બેઠક યોજી છે. પીએમઓ અનુસાર, આ બેઠકમાં આવશ્યક દવાઓ, આઈસ પેક, ORS અને પીવાના પાણીની તૈયારીઓની સમીક્ષા કરવામાં આવી હતી. પીએમ મોદીની અધ્યક્ષતામાં થયેલી આ બેઠકમાં પીએમના અગ્ર સચિવ, ગૃહ સચિવ સહિત હવામાન વિભાગ અને ડિઝાસ્ટર મેનેજમેન્ટ ઓથોરિટીના અધિકારીઓએ ભાગ લીધો હતો. આ ઉપરાંત, ગરમીના મોજાને પહોંચી વળવા માટેની તૈયારીઓની સમીક્ષા કરવામાં આવી હતી.

બેઠકમાં નિર્ણય લેવામાં આવ્યો હતો કે લોકોને જાગૃત કરવા માટે ટેલિવિઝન, રેડિયો અને સોશિયલ મીડિયા પ્લેટફોર્મ પર માહિતી આપવામાં આવે. સ્થાનિક ભાષામાં પણ આ માહિતી લોકો સુધી પહોંચે તે માટે ખાસ ધ્યાન આપવામાં આવ્યું હતું. પીએમએ હોસ્પિટલોમાં પૂરતી તૈયારીઓ રાખવાની સૂચના પણ આપી હતી.

હીટવેવથી બચવા માટે જાગૃતિ ફેલાવવા માટે સૂચનો અપાયા

સરકારના નિવેદનમાં કહેવામાં આવ્યું છે કે, 2024 સામાન્ય કરતાં વધુ ગરમ રહેવાની અપેક્ષા છે. આ સમયગાળામાં સામાન્ય ચૂંટણીઓ પણ થવાની છે.  જેને ધ્યાનમાં રાખીને આરોગ્ય મંત્રાલય અને NDMA દ્વારા જારી કરાયેલી સલાહ પ્રાદેશિક ભાષાઓમાં અનુવાદિત કરવામાં આવે અને તેનો પ્રસાર કરવામાં આવે. વ્યાપકપણે પીએમ મોદીએ હીટવેવની સ્થિતિ માટે તૈયારીઓનો હિસ્સો લીધો અને સરકારના સર્વગ્રાહી અભિગમ પર ભાર મૂક્યો. પીએમએ કહ્યું કે કેન્દ્ર, રાજ્ય અને જિલ્લા સ્તરે સરકારના તમામ અંગો તેમજ વિવિધ મંત્રાલયોએ આના પર સંકલન કરીને કામ કરવાની જરૂર છે. તેમણે હોસ્પિટલોમાં પર્યાપ્ત તૈયારી તેમજ જાગરૂકતા જનરેશન, વહેલી શોધ અને જંગલની આગને બુઝાવવાની જરૂરિયાત પર પણ ભાર મૂક્યો હતો.

એપ્રિલથી જૂન વચ્ચે કાળઝાળ ગરમી પડશે

હવામાન વિભાગે આગાહી કરી છે કે આ વર્ષે આપણે એપ્રિલથી જૂન વચ્ચે કાળઝાળ ગરમીનો સામનો કરવો પડી શકે છે. 19 એપ્રિલથી દેશમાં સાત તબક્કાની સામાન્ય ચૂંટણીઓ શરૂ થઈ રહી છે. જે રાજ્યોમાં હીટ વેવની સંભાવના છે તેમાં ગુજરાત, મધ્ય મહારાષ્ટ્ર, ઉત્તર કર્ણાટક, રાજસ્થાન, મધ્યપ્રદેશ, છત્તીસગઢ, ઓડિશા અને આંધ્રપ્રદેશનો સમાવેશ થાય છે. રાહતની વાત એ છે કે આ હીટ વેવ બાદ ચોમાસું સામાન્ય રહેશે અને સારો વરસાદ થશે.