24 જૂનથી લોકસભાનું નવું સત્ર, 26 જૂને યોજાશે નવા અધ્યક્ષની ચૂંટણી

લોકસભાની અખબારી યાદીના નિવેદનમાં જણાવાયું છે કે, સરકારી કામકાજની જરૂરિયાતને આધારે સંસદનું સત્ર 3 જુલાઈ, બુધવારના રોજ પૂર્ણ થવાનું છે.

લોકસભા ચૂંટણી પૂર્ણ થયા બાદ હવે લોકસભાના સ્પીકરની ચૂંટણી 26 જૂનના રોજ યોજાશે. 18મી લોકસભાનું સત્ર 24 જૂનથી શરૂ થવા જઈ રહ્યું છે. ચૂંટણી પછી નવા ચૂંટાયેલા સાંસદો માટે આ પ્રથમ લોકસભા સત્ર હશે. સત્ર શરૂ થયાના બે દિવસ બાદ લોકસભાના સ્પીકરની ચૂંટણી યોજાશે. 

લોકસભાની અખબારી યાદીના નિવેદનમાં જણાવાયું છે કે, સરકારી કામકાજની જરૂરિયાતને આધારે સંસદનું સત્ર 3 જુલાઈ, બુધવારના રોજ પૂર્ણ થવાનું છે. આ સંસદ સત્ર દરમિયાન લોકસભાના તમામ ચૂંટાયેલા સાંસદો શપથ લેશે. 

રાષ્ટ્રપતિ દ્રૌપદી મુર્મુ લોકસભાના નવા અધ્યક્ષની નિમણૂક બાદ 27 જૂને લોકસભા અને રાજ્યસભાના સંયુક્ત સત્રને સંબોધિત કરશે. સામાન્ય રીતે નવા સાંસદોની પ્રથમ બેઠકમાં લોકસભાના અધ્યક્ષની પસંદગી કરવામાં આવે છે. નવા સ્પીકર ચૂંટાય ત્યાં સુધી, એક સાંસદ જે સૌથી વધુ લોકસભાનો અનુભવ ધરાવતા હોય, તેમને ગૃહના પ્રોટેમ સ્પીકર તરીકે પસંદ કરવામાં આવે છે. પ્રોટેમ સ્પીકર લોકસભાના પ્રથમ કેટલાક સત્રોની અધ્યક્ષતા કરે છે. નવા સ્પીકરની ચૂંટણી સુધી તેઓ પ્રોટેમ સ્પીકર તરીકે કામ કરે છે.