PM મોદીએ પ્રખ્યાત પરમાણુ વૈજ્ઞાનિક ડૉ. એમ.આર શ્રીનિવાસનના નિધન પર શોક વ્યક્ત કર્યો

પ્રધાનમંત્રી નરેન્દ્ર મોદીએ મંગળવારે (20 મે, 2025) ભારતના પરમાણુ ઊર્જા ક્ષેત્રના દિગ્ગજ અને પરમાણુ ઊર્જા આયોગના ભૂતપૂર્વ અધ્યક્ષ ડૉ. એમઆર શ્રીનિવાસનના નિધન પર શોક વ્યક્ત કર્યો. પીએમ મોદીએ કહ્યું કે, 'ભારત હંમેશા વૈજ્ઞાનિક પ્રગતિને આગળ વધારવા અને ઘણા યુવા વૈજ્ઞાનિકોને માર્ગદર્શન આપવા બદલ એમઆર શ્રીનિવાસનનો આભારી રહેશે.' ભૂતપૂર્વ પરમાણુ ઊર્જા આયોગના અધ્યક્ષ ડૉ. એમ.આર. શ્રીનિવાસનનું મંગળવારે તમિલનાડુના ઉધગમંડલમમાં અવસાન થયું હતું. તેમણે 95 વર્ષની ઉંમરે અંતિમ શ્વાસ લીધા.

પીએમ મોદીએ સોશિયલ મીડિયા પ્લેટફોર્મ X પર લખ્યું હતું કે, 'ભારતના પરમાણુ ઊર્જા કાર્યક્રમના દિગ્ગજ નેતા ડૉ. એમઆર શ્રીનિવાસનના નિધનથી ખૂબ દુઃખ થયું. મહત્ત્વપૂર્ણ પરમાણુ માળખાના વિકાસમાં તેમની મહત્ત્વપૂર્ણ ભૂમિકા ઊર્જા ક્ષેત્રમાં આપણી આત્મનિર્ભરતાનો પાયો રહી છે.'

તેમણે પોસ્ટમાં લખ્યું હતું કે, 'તેમને પરમાણુ ઊર્જા આયોગના પ્રેરણાદાયી નેતૃત્વ માટે યાદ કરવામાં આવે છે. વૈજ્ઞાનિક પ્રગતિને આગળ વધારવા અને ઘણા યુવા વૈજ્ઞાનિકોને માર્ગદર્શન આપવા બદલ ભારત હંમેશા તેમનો આભારી રહેશે. આ દુઃખની ઘડીમાં મારી સંવેદના તેમના પરિવાર અને મિત્રો સાથે છે. ઓમ શાંતિ.'

ભારતના પરમાણુ ઊર્જા કાર્યક્રમને વૈશ્વિક માન્યતા આપનારા શ્રીનિવાસનના નિધન પર સંરક્ષણ પ્રધાન રાજનાથ સિંહે શોક વ્યક્ત કર્યો હતો. તેમણે સોશિયલ મીડિયા માધ્યમ X પર લખ્યું હતું કે, 'અગ્રણી પરમાણુ વૈજ્ઞાનિક અને પરમાણુ ઊર્જા આયોગના ભૂતપૂર્વ અધ્યક્ષ ડૉ. એમ.આર. શ્રીનિવાસનના નિધનથી ખૂબ દુઃખ થયું. ભારતના પરમાણુ ઊર્જા કાર્યક્રમમાં તેમનું દૂરંદેશી નેતૃત્વ અને અપ્રતિમ યોગદાન હંમેશા યાદ રહેશે. તેમના પરિવાર અને પ્રિયજનો પ્રત્યે મારી હૃદયપૂર્વકની સંવેદના.'

જ્યારે ઉત્તરાખંડના મુખ્યમંત્રી પુષ્કર સિંહ ધામીએ x પર લખ્યું હતું કે, 'ભારતના પરમાણુ ઊર્જા ક્ષેત્રને આત્મનિર્ભર બનાવવામાં મહત્ત્વપૂર્ણ ભૂમિકા ભજવનાર મહાન વૈજ્ઞાનિક ડૉ. એમ.આર. શ્રીનિવાસનજીના અવસાનના સમાચાર ખૂબ જ દુઃખદ. તેમના નેતૃત્વમાં ભારતે પરમાણુ ઊર્જા ક્ષેત્રમાં જે સિદ્ધિઓ મેળવી તે દેશની વૈજ્ઞાનિક પ્રગતિનો પાયો બની. એક સ્વપ્નદ્રષ્ટા વિચારક અને વૈજ્ઞાનિક તરીકે તેમનું યોગદાન હંમેશા યાદ રહેશે.'