આણંદ: સરદાર સ્મૃતિ શાળા મહિલા સશક્તિકરણનું કેન્દ્ર બની

200 જેટલી મહિલાઓએ ગુજરાત આજીવિકા મિશન હેઠળ તાલીમ મેળવી

સરદાર વલ્લભભાઈ પટેલે આણંદ જીલ્લાના કરમસદની જે પ્રાથમિક શાળામાં શિક્ષણ મેળવ્યું હતું, તે સરદાર સ્મૃતિ શાળા મહિલા સશક્તિકરણનું કેન્દ્ર બની છે. આ શાળામાં 200 જેટલી મહિલાઓ ગુજરાત આજીવિકા મિશન હેઠળ તાલીમ લઇને આર્થિક રીતે પગભર બની રહી છે. નડીયાદમાં જન્મેલા સરદાર સાહેબે કરમસદમાં ધોરણ પાંચ સુધીનું પ્રાથમિક શિક્ષણ મેળવ્યું હતું. એ પછી વર્ષ 2014માં આ શાળાનો જીર્ણોદ્ધાર કરીને તત્કાલિન મુખ્યમંત્રી આનંદીબેન પટેલના હસ્તે તેનું લોકાર્પણ કરાયું હતું. સરદાર પટેલની સ્મૃતિમાં શાળાને સરદાર પટેલ સ્મૃતિ શાળા નામ આપવામાં આવ્યુ છે. આ શાળામાં ગુજરાત લાઇવલીહુડ પ્રોગ્રામ એટલે કે મહિલાઓને સ્વનિર્ભર બનાવવા માટે સિવણ ક્લાસ, તેમજ ભરતગૂંથણ અને હસ્તકલા ના તાલીમ વર્ગ ચલાવવામાં આવે છે.