ખોરાક સુરક્ષા કાયદામાં સુધારા: વાંધા-સૂચનો આપવાની સમયમર્યાદા લંબાવાઈ

ખોરાક સુરક્ષા કાયદામાં સુધારા: વાંધા-સૂચનો આપવાની સમયમર્યાદા લંબાવાઈ

ગુજરાત સરકારે 'ફુડ સેફ્ટી અને સ્ટાન્ડર્ડસ એક્ટ, 2006' ની કેટલીક દંડનીય જોગવાઈઓમાં સુધારા માટે જાહેર જનતા પાસેથી વાંધા અને સૂચનો મંગાવવાની સમયમર્યાદા લંબાવી છે. હવે રાજ્યના નાગરિકો અને ફૂડ વ્યવસાય સાથે સંકળાયેલા લોકો 22 સપ્ટેમ્બર 2025 સુધીમાં પોતાનો અભિપ્રાય આપી શકશે.

આરોગ્ય અને પરિવાર કલ્યાણ વિભાગ હેઠળના ખોરાક અને ઔષધ નિયમન તંત્ર દ્વારા આ સુધારાની પ્રક્રિયા હાથ ધરવામાં આવી છે, જેનો મુખ્ય હેતુ નાગરિકોને સલામત અને ગુણવત્તાસભર ખોરાક મળી રહે તે સુનિશ્ચિત કરવાનો છે.

કાયદામાં સુધારાનો હેતુ

કેન્દ્રિય અધિનિયમ 'ફુડ સેફ્ટી અને સ્ટાન્ડર્ડસ એક્ટ, 2006' નો ગુજરાતમાં વધુ અસરકારક અમલ કરી શકાય તે માટે રાજ્ય સરકારે કેટલીક જોગવાઈઓમાં ફેરફાર કરવાનું વિચાર્યું છે. આ માટે, સરકાર ફૂડ વ્યવસાય સાથે સંકળાયેલા વ્યક્તિઓ, એસોસિયેશનના હોદ્દેદારો અને સામાન્ય નાગરિકો પાસેથી તેમના અભિપ્રાયો અને સૂચનો મંગાવી રહી છે.

સમયમર્યાદામાં વધારો

અગાઉ આ સૂચનો રજૂ કરવાની અંતિમ તારીખ 22 ઓગસ્ટ 2025 હતી. પરંતુ, વધુમાં વધુ નાગરિકો પોતાના અભિપ્રાયો રજૂ કરી શકે તે માટે આ સમયમર્યાદા 30 દિવસ લંબાવીને 22 સપ્ટેમ્બર 2025 કરવામાં આવી છે.

ક્યાં અને કેવી રીતે સૂચનો આપવા?

જે નાગરિકો અથવા સંસ્થાઓ આ સુધારા અંગે પોતાના વાંધા-સૂચનો આપવા માંગતા હોય તેઓ આરોગ્ય અને પરિવાર કલ્યાણ વિભાગની વેબસાઈટ https://gujhealth.gujarat.gov.in/citizen-corner.htm પર જઈને સુધારાનો ડ્રાફ્ટ જોઈ શકે છે. આ લિંક પરથી ઓનલાઈન સૂચનો મોકલી શકાશે. ખોરાક અને ઔષધ નિયમન તંત્રએ લોકોને આ તકનો લાભ લેવા માટે અનુરોધ કર્યો છે.