જામનગરથી હૈદરાબાદ અને જામનગરથી બેંગ્લોરની નવી ફ્લાઇટનો આજથી આરંભ

હવાઇ ઉડ્ડયન ક્ષેત્રે જામનગરમાં આજથી નવા અધ્યાયની શરૂઆત થઇ છે. જામનગરથી આજરોજ બે નવી ફ્લાઈટ્સનો પ્રારંભ થયો છે. જે અંતર્ગત જામનગરથી હૈદરાબાદ અને જામનગરથી બેંગ્લોરની નવી ફ્લાઇટએ ઉડાન ભરી હતી. આ નવી વિમાની સેવા અંતર્ગત સપ્તાહમાં ત્રણ દિવસ મંગળવાર, ગુરુવાર અને શનિવારે ફ્લાઇટ ઉડાન ભરશે. 

કેન્દ્રીય ઉડ્ડયન મંત્રી જ્યોતિરાદિત્ય સિંધિયા, શિક્ષણ મંત્રી ભૂપેન્દ્રસિંહ ચુડાસમા, અને કેબિનેટ મંત્રી જવાહરસિંહ ચાવડાની વર્ચ્યુઅલ ઉપસ્થિતિમાં આ નવી વિમાની સેવાનો વિધિવત પ્રારંભ કરવામાં આવ્યો હતો. તો સાંસદ પૂનમ માડમ ઉદ્ધાટન સમારંભમાં હાજર રહી આ ક્ષણના સાક્ષી બન્યા હતા. કેન્દ્ર સરકારની ઉડાન યોજના અંતર્ગત નવી વિમાની સેવાનો લાભ જામનગર સહિત હાલારને મળ્યો છે ત્યારે આ નવી વીમાની સેવાને કારણે હાલારના લોકોમાં ખુશીનો માહોલ જોવા મળી રહ્યો છે.