તરણેતરના મેળામાં આકર્ષણનું કેન્દ્ર બનશે 52 ગજની અનોખી ધજા

સુરેન્દ્રનગરનો સોલંકી પરિવાર વર્ષોથી નિઃશુલ્ક બનાવે છે ત્રિનેત્રેશ્વર મહાદેવ માટેની ધજા; આ વર્ષે કેસરી કાપડ પર થ્રીડી ટિકીથી બનાવાયું ‘ૐ’

વિશ્વ પ્રસિદ્ધ તરણેતરનો મેળો નજીક આવતા ત્રિનેત્રેશ્વર મહાદેવના મંદિરે ચઢાવવામાં આવતી પરંપરાગત 52 ગજની ધજા પણ તૈયાર થઈ ગઈ છે. ખાસ વાત એ છે કે સુરેન્દ્રનગરનો સોલંકી પરિવાર વર્ષોથી આ ધજા નિઃશુલ્ક બનાવીને મંદિરે અર્પણ કરે છે. આ વર્ષે પણ પરિવાર દ્વારા વિશેષ આકર્ષણ સાથે ધજા તૈયાર કરવામાં આવી છે.

પરંપરાગત રીતે બનાવવામાં આવતી આ ધજામાં આ વર્ષે કેટલાક વિશેષ ફેરફાર કરવામાં આવ્યા છે. કેસરી રંગના કાપડ પર થ્રીડી ટિકી દ્વારા ‘ૐ’ બનાવવામાં આવ્યું છે, જે ધજાને આગવી ઓળખ આપે છે.

36 મીટર લાંબી અને સાડા સાત કિલો વજનની ધજા

ધજા બનાવનાર યુવક કેયુર સોલંકીના જણાવ્યા મુજબ, આ વર્ષની ધજા આશરે 1404 ઇંચ એટલે કે 36 મીટર લાંબી છે, જ્યારે તેની ઊંચાઈ 7 ફૂટ જેટલી છે. ધજાનું કુલ વજન આશરે સાડા સાત કિલો છે.

ધજામાં ખાસ પ્રકારની કાંગરાવાળી બોર્ડર પણ મૂકવામાં આવી છે. રાત્રિના સમયે પણ ધજા દૂરથી સરળતાથી દેખાય તે માટે તેમાં ચમકદાર સામગ્રીનો ઉપયોગ કરવામાં આવ્યો છે. કેયુર સોલંકીના જણાવ્યા પ્રમાણે, આ ધજા રાત્રિના સમયે પણ આશરે 2 કિલોમીટર દૂરથી દેખાઈ શકે તેવી રીતે તૈયાર કરવામાં આવી છે.

1971ના પૂર બાદ શરૂ થઈ પરંપરા

સોલંકી પરિવાર દ્વારા ત્રિનેત્રેશ્વર મહાદેવ માટે ધજા બનાવવાની આ પરંપરા પાછળ પણ એક ખાસ માન્યતા અને સંકલ્પ જોડાયેલો છે.

પરિવારના જણાવ્યા મુજબ, વર્ષ 1971માં આવેલા પૂર દરમિયાન જાનમાલની રક્ષા થયા બાદ સોલંકી પરિવારના વડવાઓએ ત્રિનેત્રેશ્વર મહાદેવને ધજા ચઢાવવાનો સંકલ્પ કર્યો હતો. ત્યારથી આ પરંપરા પરિવાર દ્વારા સતત જાળવી રાખવામાં આવી છે.

વર્ષો વીતી ગયા છતાં પરિવારનો આ સંકલ્પ આજે પણ યથાવત્ છે. દર વર્ષે તરણેતર મેળા દરમિયાન પરિવાર દ્વારા શ્રદ્ધાપૂર્વક ધજા તૈયાર કરવામાં આવે છે અને ત્રિનેત્રેશ્વર મહાદેવના મંદિરે ચઢાવવામાં આવે છે.

શ્રદ્ધા સાથે પરંપરાનું જતન

તરણેતરનો મેળો ગુજરાતની લોકસંસ્કૃતિ, પરંપરા અને ધાર્મિક આસ્થાનું આગવું પ્રતીક છે. મેળા દરમિયાન ત્રિનેત્રેશ્વર મહાદેવના મંદિરે ધજા ચઢાવવાની પરંપરાનું પણ વિશેષ ધાર્મિક મહત્વ છે.

સોલંકી પરિવાર દ્વારા વર્ષોથી કોઈપણ પ્રકારના સ્વાર્થ વિના નિઃશુલ્ક ધજા બનાવીને અર્પણ કરવાની પરંપરા શ્રદ્ધા, સંકલ્પ અને પરિવારની પરંપરાને જાળવી રાખવાનું સુંદર ઉદાહરણ બની છે.