ભારતની સોવરેન AI મોડલ વ્યૂહરચના પરિણામ આપી રહી છે: અશ્વિની વૈષ્ણવ

કેન્દ્રીય મંત્રી અશ્વિની વૈષ્ણવે ભારતની 'સોવરેન AI' વ્યૂહરચનાની સફળતા પર ભાર મૂકતા દેશના પ્રથમ સ્વદેશી ફાઉન્ડેશનલ મોડલ 'સર્વમ AI' ની પ્રશંસા કરી છે. સરકારના રૂ.10,300 કરોડના ઇન્ડિયા AI મિશન હેઠળ ભારતીય ભાષાઓ અને સ્થાનિક જરૂરિયાતોને અનુરૂપ ટેકનોલોજી વિકસાવવામાં આવી રહી છે. પીએમ મોદીના નેતૃત્વમાં ભારત હવે ફેબ્રુઆરીમાં 'AI ઈમ્પેક્ટ સમિટ 2026' ની યજમાની કરીને વૈશ્વિક ટેક ક્ષેત્રે નવી ઓળખ ઊભી કરવા તૈયાર છે.

 ઇલેક્ટ્રોનિક્સ અને ઇન્ફોર્મેશન ટેકનોલોજી મંત્રી અશ્વિની વૈષ્ણવે રવિવારે જણાવ્યું હતું કે સોવરેન આર્ટિફિશિયલ ઇન્ટેલિજન્સ (AI) મોડલ વ્યૂહરચના પરિણામો આપી રહી છે. આ દરમિયાન તેમણે ઘરેલું સ્ટાર્ટઅપ 'સર્વમ AI' દ્વારા બહાર પાડવામાં આવેલા એડવાન્સ મોડલના વખાણ કર્યા હતા.

ગયા વર્ષે, આ સ્ટાર્ટઅપને દેશનું પ્રથમ આર્ટિફિશિયલ ઇન્ટેલિજન્સ ફાઉન્ડેશનલ મોડલ બનાવવા માટે પસંદ કરવામાં આવ્યું હતું. 67 પ્રપોઝલમાંથી સર્વમ AI ને ભારતનું પ્રથમ સ્વદેશી ફાઉન્ડેશનલ મોડલ બનાવવા માટે શોર્ટલિસ્ટ કરવામાં આવ્યું હતું.

વૈષ્ણવે એક્સ (X) પોસ્ટમાં જણાવ્યું હતું કે, "અમારા AI મિશનના ભાગ રૂપે સર્વમ દ્વારા બહાર પાડવામાં આવેલા ટેકનોલોજીમાં એડવાન્સ મોડલની સૌથી વધુ ટીકા કરનારા લોકો પણ પ્રશંસા કરી રહ્યા છે. અમારા સ્માર્ટ યુવા એન્જિનિયરો મટિરિયલ સાયન્સ, હેલ્થકેર અને સાયબર સિક્યોરિટીમાં એવા ઇનોવેશન પર કામ કરી રહ્યા છે, જેને વિશ્વ પાથબ્રેકિંગ મોડલ તરીકે જોશે."

સર્વમ AI એ ભારતીય ભાષાઓ માટે શ્રેષ્ઠ ટેક્સ્ટ-ટુ-સ્પીચ, સ્પીચ-ટુ-ટેક્સ્ટ અને OCR મોડલ્સ બનાવ્યા છે.

ગયા વર્ષે ડિસેમ્બરમાં સર્વમ AI ના કો-ફાઉન્ડર પ્રત્યુષ કુમારે ઇન્ડિયા-AI મિશન હેઠળ મલ્ટિલિંગ્યુઅલ AI સિસ્ટમ્સ દર્શાવી હતી, જેમાં ભારતીય ભાષાઓ માટે ભારતનું પ્રથમ સોવરેન ફાઉન્ડેશનલ લાર્જ લેંગ્વેજ મોડલ  પણ સામેલ હતું.

ભારતના AI ઇકોસિસ્ટમને મજબૂત કરવાની દિશામાં એક મહત્વપૂર્ણ પગલું ભરતા મોદી સરકારે 2024 માં 10,300 કરોડ રૂપિયાના ફાળવણી સાથે ઇન્ડિયા AI મિશનને મંજૂરી આપી હતી. આગામી પાંચ વર્ષમાં મળનારી આ ફંડિંગ ઇન્ડિયા-AI મિશનના અલગ-અલગ ભાગોને પ્રોત્સાહન આપવામાં મદદ કરશે.

ગયા મહિને પીએમ મોદીએ સ્ટાર્ટઅપ્સને સામાજિક કલ્યાણ માટે AIનો ઉપયોગ કરવા વિનંતી કરી હતી. 7, લોક કલ્યાણ માર્ગ સ્થિત પોતાના નિવાસસ્થાને ભારતીય AI સ્ટાર્ટઅપ્સ સાથે રાઉન્ડટેબલની અધ્યક્ષતા કરતા, પ્રધાનમંત્રીએ AIને સસ્તું, સર્વસમાવેશક અને પારદર્શક બનાવવાનો આગ્રહ કર્યો હતો.

પીએમ મોદીએ જણાવ્યું કે ભારત 16 થી 20 ફેબ્રુઆરી સુધી 'ઈન્ડિયા AI ઈમ્પેક્ટ સમિટ 2026' ની યજમાની કરશે, જેના દ્વારા દેશ ટેકનોલોજી ક્ષેત્રે મહત્વની ભૂમિકા ભજવશે. તેમણે એવો પણ સૂચવ્યો હતો કે ભારતીય AI મોડલ્સ અલગ હોવા જોઈએ અને તેમણે સ્થાનિક તેમજ સ્વદેશી કન્ટેન્ટ અને પ્રાદેશિક ભાષાઓને પ્રોત્સાહન આપવું જોઈએ.