ચેમ્પિયન્સ ટ્રોફીમાં આજે IND vs NZ: વિજેતા ટીમ ઓસ્ટ્રેલિયા સામે સેમિફાઇનલ રમશે; વર્ષ 2000માં ન્યૂઝીલેન્ડે ફાઇનલમાં ભારતને હરાવ્યું હતું

ભારતીય ટીમ આજે ચેમ્પિયન્સ ટ્રોફીમાં ન્યુઝીલેન્ડ સામે રમશે. બંને ટીમો સેમિફાઇનલમાં પહોંચી ગઈ છે. આ વિરાટ કોહલીનો 300મો વનડે મેચ હશે. આ મેચ ગ્રૂપ Aની ટોચની ટીમ નક્કી કરશે.

ભારતીય ટીમ આજે બપોરે ચેમ્પિયન્સ ટ્રોફીમાં ન્યુઝીલેન્ડ સામે રમશે. બંને ટીમો પોતપોતાની બે મેચ જીતીને ટુર્નામેન્ટની સેમિફાઇનલમાં પહોંચી ગઈ છે. આજની મેચ નક્કી કરશે કે ગ્રૂપ Aમાં કઈ ટીમ ટોચ પર રહેશે. ગ્રૂપ બીમાંથી દક્ષિણ આફ્રિકા પ્રથમ ક્રમે આવ્યું, જ્યારે ઓસ્ટ્રેલિયા બીજા ક્રમે આવ્યું. ભારતીય ટીમના સ્ટાર વિરાટ કોહલી આજે પોતાના કરિયરનો 300મો વનડે મેચ રમશે.

ભારતે તેની પહેલી મેચમાં બાંગ્લાદેશને હરાવ્યું અને પછી તેના કટ્ટર હરીફ પાકિસ્તાનને હરાવ્યું. બીજી તરફ ન્યુઝીલેન્ડે તેની પહેલી મેચમાં યજમાન પાકિસ્તાનને હરાવ્યું અને પછી બાંગ્લાદેશને હરાવીને સેમિફાઇનલમાં પ્રવેશ મેળવ્યો. ભારત અને ન્યુઝીલેન્ડ વચ્ચેની મેચ 24 વર્ષ પહેલા ચેમ્પિયન્સ ટ્રોફીમાં રમાઈ હતી. વર્ષ 2000માં બંને ટીમો ફાઇનલ રમી હતી, જેમાં કિવી ટીમ સફળ રહી હતી.

ચેમ્પિયન્સ ટ્રોફીમાં ભારત અને ન્યુઝીલેન્ડની ટીમો વચ્ચે એકમાત્ર મેચ વર્ષ 2000માં રમાઈ હતી. ત્યારે બંને ટીમોએ ટુર્નામેન્ટની ફાઈનલ મેચમાં એકબીજાનો સામનો કર્યો હતો. તે મેચમાં ટીમ ઈન્ડિયાએ પ્રથમ બેટિંગ કરતા 50 ઓવરમાં 6 વિકેટ ગુમાવીને 264 રન બનાવ્યા હતા. જ્યારે ન્યુઝીલેન્ડે બે બોલ બાકી રહેતા 6 વિકેટ ગુમાવીને આ લક્ષ્ય હાંસલ કર્યું અને કિવી ટીમ ચેમ્પિયન બની. ત્યારબાદ આ ટુર્નામેન્ટમાં આ બંને ટીમો વચ્ચે કોઈ મેચ રમાઈ નથી. જોકે, હવે 25 વર્ષ પછી આ બંને ટીમો દુબઈમાં ટકરાવવા માટે તૈયાર છે. આ મેચ આજે 2 માર્ચે રમાશે.

જણાવી દઈએ કે, ભારત અને ન્યુઝીલેન્ડની ટીમો વચ્ચે અત્યાર સુધીમાં 118 ODI મેચ રમાઈ છે. આ સમયગાળા દરમિયાન, ટીમ ઈન્ડિયાએ 60 મેચ જીતી છે. જ્યારે ન્યુઝીલેન્ડ ફક્ત 50 મેચ જીતવામાં સફળ રહ્યું છે. બીજી તરફ, ભારતીય ટીમે બંને ટીમો વચ્ચે રમાયેલી છેલ્લી 5 ODI મેચ જીતી છે. આનો અર્થ એ થયો કે આ મેચમાં પણ ટીમ ઈન્ડિયાનો હાથ ઉપર રહેશે.

ભારતીય ટીમની સંભવિત પ્લેઇંગ ઇલેવન
રોહિત શર્મા (કેપ્ટન), શુભમન ગિલ, વિરાટ કોહલી, શ્રેયસ ઐયર, ઋષભ પંત (વિકેટકીપર), હાર્દિક પંડ્યા, અક્ષર પટેલ, રવિન્દ્ર જાડેજા, અર્શદીપ સિંહ, મોહમ્મદ શમી, કુલદીપ યાદવ.

ન્યુઝીલેન્ડની સંભવિત પ્લેઇંગ ઇલેવન
વિલ યંગ, ડેવોન કોનવે, કેન વિલિયમસન, રચિન રવિન્દ્ર, ટોમ લેથમ (વિકેટકીપર), ગ્લેન ફિલિપ્સ, માઈકલ બ્રેસવેલ, મિશેલ સેન્ટનર (કેપ્ટન), મેટ હેનરી, કાયલ જેમીસન, વિલિયમ ઓ'રોર્ક.