વિશ્વ તીરંદાજી ચેમ્પિયનશિપ 2025 ના પ્રથમ દિવસે, ભારતના બે મેડલ પાક્કા

વિશ્વ તીરંદાજી ચેમ્પિયનશિપના પ્રથમ જ દિવસે પુરૂષ અને મિશ્ર ટીમ સ્પર્ધાના ફાઇનલમાં પ્રવેશ મેળવી લીધો છે અને બે મેડલ પાક્કા કરી લીધા

પ્રતિભાશાળી કમ્પાઉન્ડ તીરંદાજ ઋષભ યાદવના શાનદાર પ્રદર્શનના લીધે ભારતે શનિવારે દક્ષિણ કોરિયાના ગ્વાંગઝૂમાં યોજાઈ રહેલી વિશ્વ તીરંદાજી ચેમ્પિયનશિપના પ્રથમ જ દિવસે પુરૂષ અને મિશ્ર ટીમ સ્પર્ધાના ફાઇનલમાં પ્રવેશ મેળવી લીધો છે અને બે મેડલ પાક્કા કરી લીધા છે. ઋષભે, જેણે ક્વોલિફિકેશન રાઉન્ડમાં 709 પોઇન્ટ મેળવીને આઠમું સ્થાન મેળવ્યું હતું, અમન સૈની અને પ્રથમેશ ફુગે સાથે મળીને બીજા ક્રમે રહેલી ભારતીય પુરૂષ ટીમને ઑસ્ટ્રેલિયાને 232-232 (શૂટ-ઑફ: 30-28), યુએસએને 234-233 અને તુર્કીને 234-232થી હરાવવામાં મદદ કરી અને હવે ખિતાબી મુકાબલામાં તેમનો સામનો ફ્રાન્સ સાથે થશે.

આ યુવા ખેલાડીએ અનુભવી વી. જ્યોતિ સુરેખા (707 પોઇન્ટ સાથે ત્રીજા ક્રમે રહેલી ટોચની ભારતીય કમ્પાઉન્ડ મહિલા) સાથે મળીને ચોથા ક્રમે રહેલી ભારતીય મિશ્ર ટીમને જર્મનીને 160-152, એલ સેલ્વાડોરને 157-153 અને ચાઇનીઝ તાઇપેઈને 157-155થી હરાવવામાં મદદ કરી અને હવે ફાઇનલ મુકાબલો નેધરલેન્ડ્સ સાથે થશે. તેમ છતાં, જ્યોતિ, પરનીત કૌર અને પૃથિકા પ્રદીપની ગત ચેમ્પિયન ભારતીય ટીમ બીજા રાઉન્ડમાં ઇટાલી સામે 229-233થી હારી જતા બહાર થઈ ગઈ.