19 વર્ષીય દિવ્યા દેશમુખ ચેસ મહિલા વર્લ્ડ કપ જીત્યો; ફાઇનલમાં ભારતની જ કોનેરુ હમ્પીને હરાવી

19 વર્ષીય દિવ્યા દેશમુખે ફિડે મહિલા ચેસ વર્લ્ડ કપ (FIDE 2025) જીતીને ઇતિહાસ રચ્યો છે. તે આ પ્રતિષ્ઠિત ખિતાબ જીતનારી પ્રથમ ભારતીય મહિલા બની છે. ફાઇનલમાં તેનો મુકાબલો અન્ય કોઈ સાથે નહીં, પરંતુ ભારતની ટોચની ખેલાડી કોનેરુ હમ્પી સાથે હતો. બાકુમાં યોજાયેલી ઓલ-ઇન્ડિયન ફાઇનલમાં દિવ્યાએ કોનેરુ હમ્પીને રેપિડ ટાઇ-બ્રેકમાં 1.5–0.5થી હરાવી. પ્રધાનમંત્રી નરેન્દ્ર મોદીએ આ સિદ્ધિ માટે દિવ્યાને અભિનંદન પાઠવ્યા અને હમ્પીના શાનદાર પ્રયાસની પ્રશંસા કરી.

ફાઇનલ પહેલાં શનિવાર અને રવિવારે રમાયેલી ગેમ્સ ડ્રો રહી, જેમાં બંને ખેલાડીઓએ શાનદાર રમતનું પ્રદર્શન કર્યું. પ્રથમ ગેમમાં દિવ્યાએ સફેદ મોહરાઓ સાથે રમતા મજબૂત સ્થિતિ બનાવી, પરંતુ હમ્પીએ અંતે બરાબરી કરી લીધી. રવિવારની બીજી ગેમ સંતુલિત હતી. જોકે દિવ્યાએ કહ્યું કે તે બિનજરૂરી રીતે મુશ્કેલીમાં પડી ગઈ હતી અને પછી તેણે પોતાની પકડ જાળવી રાખી.

ટાઇ-બ્રેકમાં દિવ્યાએ કમાલ કરી દીધો. પ્રથમ રેપિડ ગેમ ડ્રો રહી, પરંતુ બીજી ગેમમાં હમ્પી સમયના દબાણમાં ભૂલો કરી બેઠી, જેનો દિવ્યાએ ફાયદો ઉઠાવ્યો. તેણે જીત હાંસલ કરી અને 2025 મહિલા વિશ્વ કપ ચેમ્પિયન બની. તે મહિલા ગ્રાન્ડમાસ્ટરનો ખિતાબ જીતનારી ભારતની ચોથી અને દેશની 88મી ગ્રાન્ડમાસ્ટર બની.

PM મોદીએ સોશિયલ મીડિયા પ્લેટફોર્મ X પર પોસ્ટ કરતા ખેલાડીઓને તેમના ઐતિહાસિક પ્રદર્શન પર અભિનંદન પાઠવ્યા. તેમણે પોસ્ટમાં લખ્યું, "બે શાનદાર ભારતીય શતરંજ ખેલાડીઓનો એક ઐતિહાસિક ફાઇનલ મુકાબલો! યુવા દિવ્યા દેશમુખના FIDE મહિલા વિશ્વ શતરંજ ચેમ્પિયન 2025 બનવા પર ગર્વ છે. આ નોંધપાત્ર સિદ્ધિ માટે તેમને અભિનંદન. આ જીત ઘણા યુવાનોને પ્રેરિત કરશે. કોનેરુ હમ્પીએ પણ પૂરી ચેમ્પિયનશિપમાં ઉત્કૃષ્ટ કૌશલ્યનું પ્રદર્શન કર્યું છે. બંને ખેલાડીઓને તેમના ભવિષ્યના ઇવેન્ટ્સ માટે શુભેચ્છાઓ."

ફાઇનલ પછી દિવ્યાએ કહ્યું, "આ નસીબનો ખેલ હતો. ટુર્નામેન્ટ પહેલાં હું વિચારી રહી હતી કે કદાચ ગ્રાન્ડમાસ્ટર નોર્મ હાંસલ કરી લઉં અને પછી આખરે હું ગ્રાન્ડમાસ્ટર બની ગઈ."

દિવ્યા દેશમુખના ચેમ્પિયન બનવા પર તેના પરિવારમાં ખુશીનો માહોલ છે. તેની કાકી ડો. સ્મિતા દેશમુખે કહ્યું, "દિવ્યાની સખત મહેનત, તેના માતા-પિતાનો ત્યાગ અને આ વર્ષે તેના દ્વારા રમાયેલી શ્રેષ્ઠ રમતની સખત મહેનત હવે બધાની સામે આવી રહી છે. અમને દિવ્યાના આવવાની રાહ છે અને આ અમારા પરિવાર માટે ખુશીની પળ છે."

દિવ્યા દેશમુખની જીત એટલા માટે પણ ખાસ છે કારણ કે તેની સામે મુશ્કેલ પડકાર હતો. ટાઇ-બ્રેકમાં તે એક અંડરડોગ તરીકે ઉતરી હતી, જ્યારે કોનેરુ હમ્પી બે વખતી વિશ્વ રેપિડ ચેમ્પિયન અને ક્લાસિકલ શતરંજમાં વિશ્વ નંબર 5 છે. જ્યારે, દિવ્યા FIDE મહિલા રેન્કિંગમાં ક્લાસિકલમાં 18મા, રેપિડમાં 22મા અને બ્લિટ્ઝમાં 18મા સ્થાને હતી.

નાગપુરની દિવ્યાની આ જીત તેની શાનદાર ઉભરતી પ્રતિભાનો પુરાવો છે. ગયા વર્ષે તેણે વિશ્વ જુનિયર ચેમ્પિયનશિપ જીતી હતી. 2024માં બુડાપેસ્ટમાં યોજાયેલા શતરંજ ઓલિમ્પિયાડમાં તેણે ભારતના સુવર્ણ પદક જીતવામાં મહત્વપૂર્ણ ભૂમિકા ભજવી હતી. બાકુમાં તેની જીતે તેને શતરંજની દુનિયામાં ઉભરતો સિતારો બનાવી દીધો છે.