IPLના ઈતિહાસમાં સૌથી વધુ વિકેટ લેનાર બીજા બોલર બન્યા પીયૂષ ચાવલા
Live TV
-
મુંબઈ ઈન્ડિયન્સના અનુભવી સ્પિનર પીયૂષ ચાવલા IPLના ઈતિહાસમાં સૌથી વધુ વિકેટ લેનાર બીજો બોલર બની ગયા છે. તેમણે ગયા શુક્રવારે વાનખેડે સ્ટેડિયમમાં કોલકાતા નાઈટ રાઈડર્સ (KKR) સામે આ સિદ્ધિ મેળવી હતી.
પીયૂષ ચાવલાએ પાવરપ્લે પછી પ્રથમ બોલ પર વિસ્ફોટક બેટ્સમેન રિંકુ સિંઘને આઉટ કરીને ડ્વેન બ્રાવોથી આગળ થઇ અને 184 વિકેટ સાથે બીજા નંબરના સૌથી વધુ વિકેટ લેનાર બોલર બન્યા હતા.
નોંધનીય છે કે, રાજસ્થાન રોયલ્સના સ્ટાર સ્પિનર યુઝવેન્દ્ર ચહલ આ લીગના ઈતિહાસમાં સૌથી વધુ 200 વિકેટ લેનાર બોલર છે. પૂર્વ ચેન્નાઈ સુપર કિંગ્સ અને મુંબઈ ઈન્ડિયન્સના ફાસ્ટ બોલર ડ્વેન બ્રાવો 183 વિકેટ સાથે ત્રીજા સ્થાને છે, જ્યારે સનરાઈઝર્સ હૈદરાબાદના ફાસ્ટ બોલર ભુવનેશ્વર કુમાર 178 વિકેટ સાથે ચોથા સ્થાન પર છે.
ગયા શુક્રવારે રમાયેલી મેચની વાત કરીએ તો, વેંકટેશ અય્યર અને મનીષ પાંડે વચ્ચેની 83 રનની ભાગીદારીને કારણે પ્રથમ બેટિંગ કરતા KKRએ તમામ વિકેટ ગુમાવીને 169 રન બનાવ્યા હતા.
જવાબમાં મુંબઈ ઈન્ડિયન્સ 18.5 ઓવરમાં 145 રનમાં ઓલઆઉટ થઈ ગઈ હતી અને KKRએ 24 રને મેચ જીતી લીધી હતી. KKR તરફથી મિચેલ સ્ટાર્કે 3.5 ઓવરમાં 33 રન આપીને 4 વિકેટ ઝડપી હતી. મુંબઈ માટે સૂર્યકુમાર યાદવે શાનદાર અડધી સદી સાથે 56 રન બનાવ્યા હતા.