ભાવનગર નજીક જાનૈયા ભરેલી ટ્રક પુલ પરથી ખાબકી, 31 લોકોના મોત

ભાવનગર જિલ્લામાં વહેલી સવારે એક ગમખ્વાર અકસ્માત સર્જાયો છે. ડ્રાઇવરે સ્ટિયરિંગ પરથી કાબુ ગુમાવતાં આ ટ્રક નાળામાં ખાબકતા ગોઝારો અકસ્માત સર્જાયો હતો.

ભાવનગર જિલ્લામાં વહેલી સવારે એક ગમખ્વાર અકસ્માતમાં 31 લોકોના કમકમાટી ભર્યા મોત થયા છે. અનીડા ગામના કોળી સમાજની જાન દિકરા વિનયભાઈના લગ્ન કરાવવા ઢસા તાલુકાના ટાકમ ગામે પહોંચવા નીકળી હતી. 60 જેટલા જાનૈયાને લઈ જઈ રહેલો ટ્રક રંધોળા ગામ નજીક નદીના પુલ પરથી સૂકી નદીમાં ખાબકતા દુર્ઘટના સર્જાઈ હતી. પ્રથામિક તપાસમાં ડ્રાઈવરે સ્ટેરિંગ પરથી કાબૂ ગુમવાતા અકસ્માત સર્જાયો હોવાનું જાણવા મળ્યું છે. આ દુર્ઘટના 31 જાનૈયાનો ભોગ લઈ ચૂકી છે. કરૂણતા એ છે કે,દુર્ઘટનામાં વરરાજાના પિતા પ્રવિણભાઈ વાઘેલા અને માતા પ્રભાબેન વાઘેલા સહિતના 31 કુટુંબીજનોના મૃત્યુ થયા હતા.

ઘટનાની જાણ થતાં 108 એમ્બ્યુલન્સ સહિતની ટીમ ઘટનાસ્થળે પહોંચી ઈજાગ્રસ્તોને સિહોર ટીબી હોસ્પિટલમાં દાખલ કરાયા છે. આ સાથે જ બનાવની જાણ થતાં જિલ્લા કલેકટર અને આરોગ્ય વિભાગ મદદે દોડી ગયા હતા.