સિનવારના મૃત્યુ પર રાષ્ટ્રપતિ બાઈડેનની પ્રતિક્રિયા, કહ્યું 'ઇઝરાયેલ, અમેરિકા અને દુનિયા માટે આ સારો દિવસ'

ઇઝરાયેલ સંરક્ષણ દળોએ ગુરુવારે તેના સૌથી મોટા દુશ્મન હમાસના વડા યાહ્યા સિનવારને તેની લશ્કરી કાર્યવાહીના ભાગરૂપે ગાઝામાં મારી નાખ્યો. સિનવારે ગયા વર્ષે ઇઝરાયેલ પર હમાસના આતંકવાદી હુમલાનું નેતૃત્વ કર્યું હતું અને તે ઇઝરાયેલના હિટ લિસ્ટમાં હતો. સિનવારના મૃત્યુ પછી, ઇઝરાયેલે કહ્યું કે તેણે તેનો બદલો પૂર્ણ કરી લીધો છે પરંતુ જ્યાં સુધી બંધકોને મુક્ત કરવામાં નહીં આવે ત્યાં સુધી તેની લડત ચાલુ રહેશે.

આખી દુનિયા માટે આ સારો દિવસ: જો બાઇડન

અમેરિકી રાષ્ટ્રપતિ જો બાઇડને યાહ્યા સિનવારના નિધન પર પ્રતિક્રિયા આપતા કહ્યું કે આ સમગ્ર વિશ્વ માટે સારો દિવસ છે. તેમણે કહ્યું કે ડીએનએ પરીક્ષણથી પુષ્ટિ થઈ છે કે સિનવાર માર્યો ગયો હતો. ઇઝરાયેલ અને અમેરિકાની સાથે આખી દુનિયા માટે આ સારો દિવસ છે. ઇઝરાયેલના બંધકોને છોડાવવા માટે આ એક સારી તક છે. આનાથી એક વર્ષથી ચાલી રહેલા ગાઝા યુદ્ધનો અંત આવશે. યુએસ વાઇસ પ્રેસિડેન્ટ અને ડેમોક્રેટિક ઉમેદવાર કમલા હેરિસે પણ કહ્યું છે કે હજારો નિર્દોષ લોકોની હત્યા માટે જવાબદાર હમાસ નેતા યાહ્યાના મૃત્યુને કારણે અમેરિકા, ઇઝરાયેલ અને સમગ્ર વિશ્વ વધુ સારી સ્થિતિમાં છે. ગાઝામાં યુદ્ધનો અંત લાવવાની આ તક છે.

ઇઝરાયલે ગુરુવારે રાત્રે હમાસના વડા યાહ્યા સિનવારને માર્યો હોવાનો દાવો કર્યો હતો. ઇઝરાયેલ અને અમેરિકા દાવો કરી રહ્યા છે કે યાહ્યા સિનવારે ગયા વર્ષે 7 ઑક્ટોબરે દક્ષિણ ઈઝરાયેલમાં આતંકવાદી હુમલાની આગેવાની કરી હતી, જેમાં 1200 લોકો માર્યા ગયા હતા અને લગભગ 250 લોકોને બંધક બનાવવામાં આવ્યા હતા.

ઉલ્લેખનીય છે કે જુલાઇમાં તેહરાનમાં ઇઝરાયેલની કાર્યવાહીમાં હમાસના નેતા ઇસ્માઇલ હાનિયાના માર્યા ગયા બાદ સિનવારને હમાસનો ચીફ બનાવવામાં આવ્યો હતો. સિનવારનો જન્મ 1962 માં ગાઝા સિટીના ખાન યુનિસમાં શરણાર્થી શિબિરમાં થયો હતો. હમાસની રચના 1987માં થઈ હતી અને યાહ્યા સિનવાર તેના સ્થાપક સભ્યોમાંના એક હતા. પોતાની ક્રૂરતા માટે કુખ્યાત સિનવારે તેના 12 સહયોગીઓને શંકાના આધારે મારી નાખ્યા, ત્યારબાદ તે ખાન યુનિસના કસાઈ તરીકે ઓળખાવા લાગ્યો.