ઇજીપ્તના રાષ્ટ્રપતિ અબ્દેલ ફતા અલ સીસી પ્રજાસત્તાક દિવસની ઉજવણીમાં મુખ્ય અતિથિ તરીકે ઉપસ્થિત રહેશે

ઇજિપ્તના રાષ્ટ્રપતિ અબ્દેલ ફતા અલ-સીસી આ મહિનાની 24 થી 26મી સુધી ભારતની મુલાકાતે આવશે. રાષ્ટ્રપતિ ભારતના 74માં પ્રજાસત્તાક દિવસ પર મુખ્ય અતિથિ હશે. તેમની સાથે પાંચ મંત્રીઓ અને વરિષ્ઠ અધિકારીઓ સહિત એક ઉચ્ચ સ્તરીય પ્રતિનિધિમંડળ પણ આવશે. આ પહેલીવાર છે જ્યારે ઇજિપ્તના રાષ્ટ્રપતિને પ્રજાસત્તાક દિવસ પર મુખ્ય અતિથિ તરીકે આમંત્રણ આપવામાં આવ્યું છે. પ્રજાસત્તાક દિવસની પરેડમાં ઇજિપ્તની સેનાની એક સૈન્ય ટુકડી પણ ભાગ લેશે.

ઇજિપ્તના રાષ્ટ્રપતિએ અગાઉ ઓક્ટોબર 2015માં ત્રીજી ભારત-આફ્રિકા ફોરમ સમિટમાં ભાગ લેવા અને સપ્ટેમ્બર 2016માં રાજ્યની મુલાકાતે ભારતની મુલાકાત લીધી હતી. ભારત અને ઇજિપ્ત આ વર્ષે રાજદ્વારી સંબંધોની સ્થાપનાના 75 વર્ષની ઉજવણી કરી રહ્યા છે. 2022-23માં G-20 ના ભારતના પ્રમુખપદ દરમિયાન ઇજિપ્તને પણ 'ગેસ્ટ કન્ટ્રી' તરીકે આમંત્રણ આપવામાં આવ્યું છે.

ઇજીપ્તના રાષ્ટ્રપતિ અબ્દેલ ફતા અલ સીસીની ભારત મુલાકાત સમયે ભારત – ઇજીપ્ત વચ્ચે કૃષિથી લઇ ડીજીટલ સહિત વિવિધ ક્ષેત્રના કેટલાક સમજુતી કરાર પર હસ્તાક્ષર થવાની સંભાવના છે.

ઇજીપ્તના રાષ્ટ્રપતિ અલ સીસી આગામી 25 તારીખે નવી દિલ્હી પહોચશે અને પ્રધાનમંત્રી નરેન્દ્ર મોદી સાથે બેઠક કરશે. તેઓ ઉપરાષ્ટ્રપતિ જગદીપ ધનખરની મુલાકાત લેશે તથા રાષ્ટ્રપતિ દ્રોપદી મુર્મુ દ્વારા આયોજીત ભોજન સમારંભમાં હાજરી આપશે. રાષ્ટ્રપતિ ભવન ખાતે તેમનું ઔપચારિક સ્વાગત કરવામાં આવશે. તેઓ ભારતના ઉદ્યોગપતિ સાથે વાતચીત કરે તેવી પણ સંભાવના છે. આ મુલાકાત દરમિયાન ભારત ઇજીપ્ત વચ્ચેના રાજદ્વારી સંબંધોના 75 વર્ષ પુર્ણ થયાની સ્મૃતિમાં ટપાલ ટિકિટ પણ બહાર પડાશે.