હવામાન વિભાગનું આગામી ચાર દિવસ દરમિયાન મધ્ય અને દક્ષિણ પ્રદેશોમાં વરસાદ માટે યલો એલર્ટ જાહેર

ભારતીય હવામાન વિભાગ (IMD) એ આગામી ચાર દિવસ માટે મધ્ય અને દક્ષિણ પ્રદેશો સહિત દેશના ઘણા ભાગોમાં વરસાદ, વાવાઝોડા અને વીજળી માટે યલો એલર્ટની ચેતવણી જારી કરી છે. હવામાન વિભાગે જણાવ્યું કે, દક્ષિણ પશ્ચિમ ચોમાસું મધ્ય અરબી સમુદ્ર, કર્ણાટક, મહારાષ્ટ્ર, તેલંગાણા, તટીય આંધ્રપ્રદેશ અને બંગાળની ખાડીના મોટાભાગના ભાગોમાં આગળ વધ્યું છે. 

દક્ષિણપશ્ચિમ ચોમાસાની વધુ પ્રગતિ સાથે, આગામી ચાર દિવસ દરમિયાન કોંકણ, ગોવા, મહારાષ્ટ્ર, મરાઠવાડા, સૌરાષ્ટ્ર, કચ્છ, દરિયાકાંઠાના આંધ્રપ્રદેશ, યાનમ, રાયલસીમા, તેલંગાણા અને કર્ણાટકમાં વાવાઝોડાં અને વીજળીના ચમકારા સાથે હળવાથી મધ્યમ વરસાદની સંભાવના છે. હવામાન વિભાગે આ જ સમયગાળા દરમિયાન ઉત્તર પૂર્વ પ્રદેશ, પશ્ચિમ બંગાળ અને સિક્કિમમાં વાવાઝોડાં અને વીજળીના ચમકારા સાથે વ્યાપક વરસાદની આગાહી પણ કરી છે. 

આજે ઉત્તર પશ્ચિમ ભારતમાં કેટલાક સ્થળોએ વરસાદ અને વાવાઝોડાની શક્યતા છે. હવામાન વિભાગે કહ્યું કે જમ્મુ, કાશ્મીર, લદ્દાખ, ગિલગિટ, મુઝફ્ફરાબાદ, હિમાચલ પ્રદેશ અને ઉત્તરાખંડમાં પણ આગામી બે-ત્રણ દિવસ સુધી આવી જ સ્થિતિ સર્જાવાની શક્યતા છે. હીટવેવ પર, હવામાન વિભાગે કહ્યું કે ઉત્તર પ્રદેશના કેટલાક ભાગોમાં સોમવાર સુધી તીવ્ર ગરમીની સ્થિતિ પ્રવર્તે તેવી શક્યતા છે. મધ્યપ્રદેશ, ઝારખંડ, પંજાબ, હરિયાણા, બિહાર અને ઓડિશામાં આગામી બે-ત્રણ દિવસ સુધી હીટ વેવની સંભાવના છે. 

હવામાન વિભાગે એ પણ આગાહી કરી છે કે આગામી 3-4 દિવસ દરમિયાન દક્ષિણ છત્તીસગઢ, દક્ષિણ ઓડિશા અને બંગાળની ખાડીના બાકીના ભાગોના કેટલાક વધુ ભાગોમાં દક્ષિણપશ્ચિમ ચોમાસું આગળ વધવા માટે સ્થિતિ અનુકૂળ છે.

દરમિયાન દિલ્હીમાં, હવામાન વિભાગે આગામી બે દિવસ માટે ધૂળની ડમરીઓ અને વાવાઝોડાની આગાહી કરી છે. રાષ્ટ્રીય રાજધાનીમાં આજે મહત્તમ તાપમાન 43 ડિગ્રી સેલ્સિયસની આસપાસ રહેવાની શક્યતા છે.