મંદિરેથી સીધા મતદાન મથકે: યુવાઓના ઉત્સાહને ઝાંખો પાડે તેવા ઉત્સાહ સાથે મતદાન કરતા ૯૬ વર્ષીય કંચનબેન વિરમગામી

“ચાંદા તારા અજવાળા આખા દેશમાં રે.. નાણા મળશે પણ આવું ટાણું નહિ મળે રે..મારી બેની આવું ટાણું નહિ મળે રે..” મતદારોને મતદાન માટે અપીલ કરતા આ શબ્દો છે ૯૬ વર્ષીય કંચનબેન વિરમગામીના.
 
મતદાન પ્રત્યે યુવાઓના ઉત્સાહને ઝાંખો પાડે તેવો ઉત્સાહ સાથે તેમણે મંદિરે પૂજા પાઠ કર્યા બાદ સીધા જ મતદાન મથકે પહોંચી જઈ મતદાનની પવિત્ર ફરજ નિભાવી હતી. કંચનબેન ૦૯- સુરેન્દ્રનગર સંસદીય મતવિસ્તારમાં સમાવિષ્ટ ૬૨- વઢવાણ વિધાનસભા મત વિસ્તારમાં આવેલા બુથ નં. ૧૧૫ સુરેન્દ્રનગર-૬૫ના મતદાર છે. લોકશાહીના આ અવસરે મતદાન કરવું અત્યંત આવશ્યક છે. દરેક મતદાર પોતાનો કિંમતી મત આપે એ જરૂરી છે એમ માનીને તેમણે સર્વે મહિલાઓને ગાયન દ્વારા અનોખા અંદાજમાં અવશ્ય મતદાન કરવા સંદેશ આપ્યો હતો. આવા જ જાગૃત મતદારોથી ભારતની લોકશાહી સશક્ત છે.