ભારત વિશ્વનું ત્રીજું સૌથી મોટું ફિનટેક સ્ટાર્ટઅપ ઇકોસિસ્ટમ બન્યું

ભારત વિશ્વનું ત્રીજું સૌથી મોટું ફિનટેક સ્ટાર્ટઅપ ઇકોસિસ્ટમ બન્યું છે, જેણે 2025ના પ્રથમ નવ મહિનામાં $1.6 અબજ ડોલરનું ફંડિંગ એકઠું કર્યું છે. પ્રારંભિક તબક્કાના ફંડિંગમાં વૃદ્ધિ ભારતીય ફિનટેક સેક્ટરમાં રોકાણકારોનો મજબૂત વિશ્વાસ દર્શાવે છે. બેંગલુરુ કુલ રોકાણમાં 52% હિસ્સા સાથે ફિનટેક ફંડિંગનું મુખ્ય કેન્દ્ર બની રહ્યું છે, જે આ ક્ષેત્રની પરિપક્વતા દર્શાવે છે.

ભારત વિશ્વનું ત્રીજું સૌથી મોટું ફિનટેક સ્ટાર્ટઅપ ઇકોસિસ્ટમ બની ગયું છે અને 2025 ના પ્રથમ નવ મહિનામાં તે $1.6 અબજ ડોલરનું ફંડિંગ એકઠું કરવામાં સફળ રહ્યું છે. આ માહિતી શુક્રવારે એક રિપોર્ટમાં આપવામાં આવી હતી.

માર્કેટ ઇન્ટેલિજન્સ પ્લેટફોર્મ ટ્રૅક્સન ના આંકડાઓ અનુસાર, સ્ટાર્ટઅપ ફંડિંગના મામલે ભારત હવે માત્ર અમેરિકા અને બ્રિટનથી જ પાછળ છે, જે વૈશ્વિક સ્તરે ભારતના ફિનટેક ક્ષેત્રના વધતા મહત્ત્વને દર્શાવે છે.

પ્રારંભિક તબક્કાના સ્ટાર્ટઅપ્સે 2025 માં અત્યાર સુધીમાં $598 મિલિયન ડોલરનું ફંડિંગ એકઠું કર્યું છે, જે 2024 ના $555 મિલિયન ડોલરના આંકડા કરતાં વધુ છે, જે દર્શાવે છે કે રોકાણકારોનો વિશ્વાસ ભારતીય ફિનટેક સેક્ટરમાં જળવાયેલો છે.

જોકે,અંતિમ તબક્કાના ફંડિંગ 2025 ના પ્રથમ નવ મહિનામાં ઘટીને $863 મિલિયન ડોલર પર પહોંચી ગયું છે, જે 2024 માં સમાન સમયગાળામાં $1.2 અબજ ડોલર હતું. આની સાથે, સીડ-સ્ટેજ ફંડિંગ ઘટીને $129 મિલિયન ડોલર થયું છે.

સમીક્ષા હેઠળના સમયગાળામાં બે સ્ટાર્ટઅપ $100 મિલિયન ડોલરથી વધુનું ફંડિંગ એકઠું કરવામાં સફળ રહ્યા છે, જેમાં ગ્રો એ સિરીઝ F રાઉન્ડમાં $202 મિલિયન ડોલર અને વીવર સર્વિસિસ એ $170 મિલિયન ડોલરનું ફંડિંગ મેળવ્યું છે.

આ સમયગાળા દરમિયાન 23 અધિગ્રહણ  થયા, જે ગયા વર્ષની તુલનામાં નજીવો વધારો છે, જેમાં સૌથી મોટું અધિગ્રહણ ડિજીનેક્સ દ્વારા રિઝલ્ટિક્સ નું  $2 અબજ ડોલર માં અધિગ્રહણ હતું.

બેંગલુરુ ફિનટેક ફંડિંગના પ્રાથમિક કેન્દ્ર તરીકે પોતાનું વર્ચસ્વ જાળવી રાખ્યું છે, જેનો કુલ રોકાણમાં 52 ટકા હિસ્સો રહ્યો છે, જ્યારે મુંબઈ 22 ટકા સાથે બીજા સ્થાને છે.

ટ્રૅક્સનનાં સહ-સ્થાપક નેહા સિંહે કહ્યું, "ફંડિંગમાં નરમાઈના સમયગાળા છતાં ભારતનું ફિનટેક ઇકોસિસ્ટમ મજબૂત પ્રદર્શન કરી રહ્યું છે."

તેમણે કહ્યું, "પ્રારંભિક તબક્કામાં સતત સક્રિયતા અને નવા યુનિકોર્નનો ઉદય આ ક્ષેત્રની લાંબા ગાળાની ક્ષમતામાં રોકાણકારોના સતત વિશ્વાસને દર્શાવે છે."

સિંહે વધુમાં કહ્યું, "મુખ્ય ઇનોવેશન હબ તરીકે બેંગલુરુ અને મુંબઈનું પ્રભુત્વ ભારતના સ્ટાર્ટઅપ ઇકોસિસ્ટમની પરિપક્વતા દર્શાવે છે."